HELLO po, musta dinha? Grasya sa Ginoo, buhi pa kitang tanan, migo, hallelujah!
Pit-os na kasagaran kanato, no? Bulahan kadtong mga empleyado nga padayong nagadawat og sweldo kambyo sa ilang serbisyo.
Sa pagkatinuod, gusto nako ipahibalo nga namaligya kog grape seedlings diri sa Siyudad sa Panabo. Dili ni permamenti po, sabay ra sa uso kay daghan na man diay ang nagpananom aning grapes (ubas god) diri sa among dapit ug nagkadaiyang lugar dinhi sa Davao del Norte. Gani, sa Tagum nagakompra ang uban nakong mga kaila. Kung interesado mo, pangitaa lang ning ngalan nako sa Facebook, okay?
Nagtemporaryo kog hunong sa pagtudlo sa internet kay sakit ang akong kamot og ginamit sa kompyuter mao namaligya sa kog pantanom sa grapes aron adunay kuhaan sa adlaw-adlaw'ng ug bayad sa kuryente'g tubig, migo.
Bitaw, nasubo lang ko nga niadtong Huwebes sa dihang gihatod akong order nga mga pantanom, wala ray usa ka minuto, GIKAWAT ANG BAG SA DRAYBER NGA NINGNAUG LANG ARON ABRIHAN ANG LIKOD SA SAKYANAN. Intawon, duha ka selpon ug kwatro mil pesos nga kwarta ang nadala sa mga kawatan.
Tinuod, daghang nagpait karon busa apektado ang atong panginabuhian. Ang mga dagko ug iladong mga kompanya dinhi sa Pinas ug sa ubang nasud, nanirado na. Ug daghan pang mosunod niini sa umaabot nga adlaw kay anaa pa ang pandemya nga nagpalisod kanatong tanan, higala.
Lisod alang sa uban ang makapalit og bugas ug panud-an APAN dili kini rason nga mobuhat kita'g dautan. Katong gikawatang drayber, diniyos nga nagpatulog singot aron padayong buhion ang iyang pamilya. Unta, bisan lisod, maningkamot gihapon kita'g pangakha bisan magsagul na ang singot ug luha.
Kon ang atong pagpaningkamot aron mabuhi pinaagi sa dautan (sama sa pagpangawat ug uban pang ilegal nga kinitaan), maayo pa nga bawion na sa Kalangitan ang imo/inyong ginhawaan. Muna-muna mangod og paningkamot sa atong mga kaigsuonan unya dali lang alang sa uban nga kawaton ang ilang gihaguan.
Nagatuo ako nga walay dautang aktibidad ang magmalampuson sa dugay, busa sa imo o inyong dautan ang pamaagi aron mabuhi, paghinulsol na kay taas pa nga pag-antos ang mobalik sa imo/inyoha.
O, naglisod pod ko ug mga kaigsuonan nato pero pilia nga mobuhat og maayo ilabi na sa krisis nga panahon, higala kay ang Ginoo DILI BUTA. Kaniya kita modangop. Kaniya kiya mangayog giya sa pang adlaw-adlaw natong paglakat sa kalibotan. Dili nato paharion ang kadautan.
Ang kinawat o ilegal nimong kwarta nga gipalit og pagkaon alang sa imong pamilya, mamunga ra gayud kana sa hustong panahon.
Ayaw paabota nga mahugot imong pagmahay, igsuon. Palihog lang, maningkamot kitang tanan nga dili makahasol sa katilingban.