Teen Romance: When I’m lonely

(Katapusan sa pito ka mga gula)

Duha ka adlaw gyud nga nag-antos ko sa kasakit sa akong tikod. Napiang gyud kini ingon sa naghilot nako.

Ug karon, di na kaayo sakit ang gibati ko sa akong tikod ug tarong na kong makalakaw, di na ko magtangkiang.

“Salamat, ha, Marlo.”

Sa unang higayon mi-smile ko kang Marlo. Diha mi sa among lawn nag-estorya. Hapon niadtong tungora. Kami rang duha.

“Angay gyud nga tabangan tika, Karrel. You know bitaw nga importante ka para nako.”

Miginhawa ko pag-ayo. Naglisod kog tubag kang Marlo. Hinuon, wa na ko masuko niya.

“Wa ko magdali, Karrel. Nakahibawo ko nga di dali para nimo ang pagdesisyon labi na nga gibati kag kalagot nako kaniadto.” “Ayaw na to hunahunaa, Marlo.”

“Basta, Karrel, nia ko nga kanunay mounong nimo sa imong sitwasyon. Di man mausab ang imong pagka loner kay kini man ang gihatag sa Diyos nimo. Ayaw kalimot nga when you lonely, I’m here nga modasig ug molingaw nimo.”

Nahikatawa ko sa diyalog ni Marlo.

“May pagka korni ka man diay, Mar.” ‘Makakorni ang gugma, Karrel..

Gabii na sa pagpauli ni M,arlo. Nabatyagan ko sa akong kaugalingon nga mibati kog kalipay sa among pag-estorya ni Marlo. First time pa kini nga akong gibati ngadto sa usa ka lalaki.

Nakamatikod si Ate Lorena sa akong pagka malipayon.

Nangigham siya ug nindot kaayo siyag smile nako. Gingislitan ko ang akong maguwang nga miduol, nako dihang mibiya na si Marlo.

“Di lang gyud mahibaw-an nga moabot sa tawo ang gugma.”

Gihan-an kog kusi si Ate. Kusog siyang midagan pahilayo nako nga nagkatawa. Mikatawa na lang sab ko.

Sa misunod nga mga adlaw kanunay nang nagpamisitahan si Marlo nako. Ug sa matag higayon nga magkita ug mag-estorya mi, namatngonan ko nga nagmalipayon gyud ko. Gani, to be honest mingawon na ko kang Marlo.

Ug karon, samtang nagyaka ko sa bermuda grass sa among lawn, gisandig ko ang akong ulo sa dughan ni Marlo nga naglingkod tapad nako. Migakos ko niya. (KATAPUSAN)