ORMOC City, Leyte - Gipadayag ni Ormoc City Mayor Richard Gomez nga way angay kahadlokan ang publiko sa report nga dunay nakalas sa siyudad gumikan sa coronavirus disease (Covid-19).
Matod sa mayor, nga ang tanan nga dunay close contact sa namatay nga pasyente naka isolate na sa Covid Ligtas Isolation Facility sa Barangay Dolores.
Lakip sa gi-isolate ang 18 ka health workers nga dunay close contact sa pasyente ug ang anak sa namatay.
Dugang sa mayor nga gisiguro sa mga medical personnel nga nasunod ang strikto nga health protocol sa pagresponde.
Ang pasyente taga Kananga ug dunay travel history sa Cebu ug pag-bot diri sa Ormoc, giatake sa kasingkasing hinungdan nga gidala kini sa Ormoc Sugarcane Planters Association (OSPA) Farmers Medical Center.
Gipahigayon usab ang pagkuha og swab samples sa pasyente aron ipaubos sa confirmatory test ug nigawas nga positibo siya sa Covid-19.
Namatay ang pasyente sa miaging Hunyo 24 ug subay sa executive order, gilubong dayon sud sa 12 oras.
Padayon usab nga gimonitor ang second level contacts, pasabot niini mao ang mga tawo nga dunay close contact sa kadtong mga tawo nga dunay direktang contact sa namatay. (JKDP )