BATANG lalake naluwas sa ilang silingan dihang giingong gulgulon na unta ang liog sa ilang silingan nga hubog niadtong Huwebes sa alas 7 sa gabii, Hulyo 3, sa Barangay Malhiao, lungsod sa Badian.
Ang 12 anyos nga bata giingong nagsige og komedya kang Jordan Bandolis, 32, mag-uuma, ilang silingan.
Si Captain Gifred Baroman, hepe sa Badian Police Station nga nahinabi sa Superbalita Cebu, nagkanayon nga si Bandolis nag-inom uban sa iyang mga higala.
Ang 12 anyos, kinsa gihulagway nga guwatsinanggo ug maypaka-estoryador, nagsige og komedya kang Bandolis.
Giingong napikon ug nasuko si Bandolis sa gibuhat sa bata.
“Giingnan diay siya kuno og adik-adik mao nga pwerti niini nga sukoa. Giingnan niya ang bata nga taronga na, Dong, ha,” asoy ni Baroman.
Matod pa ni Baroman nga sa kalagot ni Bandolis sa 12 anyos, iya kining gikuptan ug gisipitan.
Ang gamay nga kutsilyo nga dala ni Bandoles giingong iyaha na untang igulgol sa liog sa bata, apan usa ka silingan daling nisumbag kang Bandolis ug gitapi ang kamot hinungdan sa pagkalagpot sa kutsilyo ug nakabuhi ang bata.
Ang ubang mga silingan nagtuo nga komedya lang ni Bandoles ang iyang gibuhat sa bata, apan nakita sa uban nga tinud-anay ang katuyoan niini.
Gihulagway ni Baroman nga putongon si Bandolis kun dali ra nga masuko kon komedyahan.
Gitanggong nila si Bandolis samtang gipaabot nila ang ginikanan sa bata sa pagpasaka og kaso batok niini. (GPL)