Milungtad nag taas nga panahon ang pakiggubat batok sa seryosong sakit nga Covid-19. Lockdown nakahagsa sa kahimtang. Gihuwad ang panudlanan pabor sa kinabuhi ug panglawas. Unang hunat ang P275 billion tabang sa mga kabos ubos sa Bayanihan to Heal as One Act (RA 11469) dugang gahom ni Pres. Rodrigo Duterte nga gihatag sa Kongreso. Nangutang og $5 billion sa World Bank, Asian Development Bank ug Asian Infrastructure Bank ubos sa DOH Emergency Response Program nga gamiton para protective equipment, hospital isolation centers, treatment centers, laboratories expansion, pagpalig-on sa Research Institute for Tropical Medicine (RITM) sa Alabang, Muntinlupa, lakip na sa sub-national ug public health laboratories sa Baguio, Cebu, Davao, Manila. Gani miabot nag 63 ka laboratory nga accredited sa DOH.
Nanawat og liboan ka mga health worker ug contact tracers. Compensation benefits sa mga health worker nga P100,000 sa nasakit ug P1 million sa nakalas. Tinguha nga lugwayan ang dugang gahom ubos sa Bayanihan to Heal as One Act.
Supplemental budget nga posibling maoy gamiton ang P1.3T nga savings sa 2019. Kon gikinahanglan, mobaligya sa pipila ka propiyedad sa gobyerno. Mayo 28 nga kwentada nakagasto na ang nasod og P353.9 billion.
Si Duterte mitanyag og P50 million ganti sa makadiskobre og tambal. Lima pa ka vaccine ang nakapasar sa solidarity clinical trials nga gipangulohan sa World Health Organization. Kini mao ang Remdesivir nga para ebola, Sars, Mers, leptospirosis ug lupos; Hydroxychloroquine para malaria ug rheuma; Lopinavir/Ritonavir para Aids; Interferon Beta para sclerosis ug Faviravir/Avigan para anti-flu.
Naay gihikay ang China, Oxford, Renegeron Pharma-US sa plasma therapy ug Dexamethasone –UK. Dunay nagtino sa tawa-tawa ug coconut oil nga kabahin sa 254 ka mga kompaniya nga naglumba sa paggamag tambal. Unang gitun-an ang Remdesivir sa Wuhan Virology Laboratory sa China, apan gipadaplin kay walay tataw nga clinical benefits. Apan lahi ang sangpotanan sa pagtuon sa US Laboratory kay nakita nga masaaron maong gihimong standard of care. Samtang Hydroxychloroquine giingong dunay side effects.
Nahinumdom ko sa among bukid utlanan sa Langub, Argao ug Tubod, Sibonga nga kon hilantan modangop gilayon sa tuob, himasmo, tutho, hampol, inom sa linaga nga luy-a, dulaw, mangagaw, oregano, init tubig nga sagolan og asin, ahos ug limonsito. Maayo pod baya. Sulayi god. Gamay rag gasto. Legal ang tuob ubos sa Traditional Alternative Medicine Act (RA 8423). Apan dunay pipila ka mga doktor ang miyam-id tingali maapektohan ang negosyo sa medisina o mominos ang kinitaan.
(csa_1156@yahoo.com/09064648954)