Sayod kita nga sugad niadtong Hunyo 23, gisuspenso na ang karaang ECQ kun enhanced community quarantine pass nga gipang-apod-apod niadtong Marso. Ang bag-ong ECQ passes mao nay gamiton hangtod kini malibkas.
Padayon ang pagtaas sa mga kaso sa nataptan sa Covid-19. Gani 353 na ka buok ang natala sa usa lang ka adlaw (Hunyo 30) sa Siyudad sa Sugbo maong numero uno kita sa tibuok nasod sa gidaghanon sa mga natakdan ug nakapahimo natong hotspot.
Gisamutan pa kini kay daghang di maminaw ug di motuo sa mga awtoridad maong mismong si Environment Secretary Roy Cimatu , nga membro sa Interagency Task Force (IATF) nga nagtan-aw sa Sugbo, mipahimangno nga kon padayon nga magmagahi ang mga Sugbuanon pag-kooperar sa mga awtoridad, ipalaygay sab og samot ang ECQ.
Sa pagka karon, 5,494 na ang kompirmadong natakdan dinhi sa atong siyudad ug 169 na ang nangamatay.
Nagsugod ang ECQ sa Cebu City niadtong Marso 28 hangtod Mayo 31 dayon gi pa-ubos kini sa General Community Quarantine (GCQ) niadtong Hunyo 1-15 unya gibalik na sab pag ECQ niadtong Hunyo 15 tungod sa padayong pagsaka sa mga kaso.
Sa pagka karon, kining 10 ka barangay ang padayong gipang lockdown, pasabot nga ang mga residente di basta basta makagawas-gawas: Mambaling, Cebu City (Jail Kalunasan), Brgy. Luz, Labangon, Suba, Kamputhaw, Tejero, Sambag 11, Duljo Fatima og Basak San Nicolas.
Ang mga mamumuo nga exempted ining bag-ong ECQ nga mahimo rang makagawas-gawas mao kining mosunod: call center agents, delivery food, trabahante sa mga ospital o tambalanan, sakop sa media (media practitioners). Kon ugali duna moy kaila nga parehas ini nila og trabaho, magtinabangay lang una kita og hangyo-pamalihog kon dunay ipa-palit labi na tambal o pagkaon.
Ang kadtong 70 ka mga barangay nga wala ma-apil sa gipang-lockdown, mahimo rang makagawas apan kutob ra sab sulod sa ilang barangay unya kana ra pong dunay importante nga tuyo, transaksiyon o paliton. Ang pagsul-ob sab og mask padayong gimando.