Kadaghanan sa mga lumolupyo sa Dakbayan sa Sugbo nangtuman na sa mga protocol sa panglawas. Mao ni ang naobserbahan nila ni Department of Environment and Natural Resources (DENR) Secretary Roy Cimatu. Bisan ang mga pulis sa dakbayan nakaoserbar na niini.
Ang problema wa tingali sa quarantine pass, kon di ang sistema sa pagpatuman sa quarantine protocol. Mahimo ra man unta nga gi-schedule ang pagpagawas base sa mga serial number sa karaang pass. Naa may record niani ang City Hall. Di unta magubot ang mga barangay sa pag-apod-apod sa pass nga bag-o nga seguradong kuwang kay ang data nga gibasehan mao ang survey nga gihimo pa niadtong 2015. Sa kapaspas lagi sa paglambo sa Sugbo, bisan duha ka tuig lang, dako na kaayog kausaban ug kalainan ang populasyon.
Nahapsay usab tungod sa pagtinuod na sa mga opisyal sa paghapak sa mga barangay kapitan nga “uncooperative.” Ang pagpadala og show cause order ngadto sa duha ka mga kapitan sa mga barangay nga nasakpang nakalapas sa protocol ang mga lumolupyo igo nang warning nga ang City Hall ug Department of the Interior and Local Government (DILG) maninuod na.
Maayo man gani nga maghimo usab og talaan ang kapulisan sa mga tawo nga madakpan ug asa sila nga barangay nagagikan. Patubagon gihapon ang mga kapitan nganong naay mga lumolupyo sa ilang barangay nga nagsige gihapon og lapas sa mga protocol.
Gikinahanglan usab ang ordinansa nga magpahamtang og bug-at nga multa sa mga makalapas, sama sa gipasar sa mga Dakbayan sa Mandaue ug Lapu-Lapu. Panahon na karon sa pinig-utay sa mga kalihukan nga naghatag og hulga sa panglawas sa publiko.
Gikinahanglan nga isalikway ang pamulitika. Ang kaayuhan sa kinabag-an ang angay ipatigbabaw. Kon naay pipila nga nakalapas, tinud-on ang pagpahamtang og silot.
Kon magpatigbabaw ang mapanagan-ong pagpatuman sa balaud, di makalingkawas ang Sugbo gikan sa enhanced community quarantine. Gikinahanglan ang higpit nga pagpatuman.