MOABOT sa 12 ka mga sakop sa Lapu-Lapu City Police Office (LCPO) ang nagpositibo sa coronavirus disease (Covid-19).
Kini ang gipahibawo ni Lapu-Lapu City Mayor Junard “Ahong” Chan. Ang 12 nalakip sa bag-ong 86 ka mga kaso sa dakbayan sa Biyernes, Hulyo 3.
Matod sa mayor nga mao kini ang rason nganong nangusog siya sa citizen’s arrest alang sa di mag facemask gumikan kay mismong mga frontliner nataptan na niining Covid-19, kansang mga kaso sa dakbayan nagsaka.
Pagpasabot ni Chan nga kuwang nang daan ang pwersa sa kapulisan aron mobadlong sa 500,000 ka populasyon sa dakbayan unya nataptan pa gayud sila.
Hinungdan nga gikinahanglan niya ang kooperasyon sa tanan pagbatok niining Covid pinaagi sa disiplina ug pagsunod sa lagda sa gobyerno.
“Sila unta ang magsilbing sundalo nga maoy mag-una sa gubat nga atong giatubang pero sila mismo ang nataptan sa atong bangis nga kaaway,” pagpasabot ni Chan.
Si Police Colonel Clarito Baja, director sa LCPO, nitug-an nga ang mga personnel nila nga nagpositibo gikan sa Traffic Enforcement Unit ug Mobile Patrol Group MPG.
Gipahimutang na sila karon sa isolation facility sa dakbayan samtang ang mga close contact niini gipaubos na usab sa swab test.
Giklaro ni Baja nga bisan pa sa pagpositibo sa iyang mga sakop magpabilin gihapon ang ilang pagserbisyo sa katawhan pinaagi sa pagpatuman sa mga lagda sa community quarantine alang sa kahapsay ug kalinaw sanglit mao man kini ang ilang tahas.
Gihangop usab niya ang plano sa kagamhanan sa paghatag og katungod sa mga Oponganon nga maoy modakop sa di motuman sa lagda sa gobyerno sama sa dili pagsul-ob og face mask pinaagi sa citizen’s arrest.
“Mas maayo man pud ni kay at least makatabang sa kapulisan pag-implementar niining pagsuot sa facemask dako kaayo og tabang,” matod ni Baja. (GCM)