DOSE ka mga bombero sa Cebu City Fire Station positibo sa coronavirus disease (Covid-19).
Mao kini ang gikompirmar ni SFO3 Wendell Villanueva, tigpamaba sa Cebu City Fire Station, sa interbyu sa Superbalita Cebu sa Hulyo 3, 2020.
Tungod niini, tulo ka fire stations ang kasamtangan nga gi-lockdown.
Si Villanueva niingon nga sa 12, tulo niini naka-recover na ug gihuwat na lang ang certification nga sila fit to work aron makabalik sa pag-duty.
Samtang ang siyam naa sa usa ka isolation center sa Dakbayan sa Sugbo padayong nagpaalim.
Gihulagway ni Villanueva nga puro asymptomatic o way simtomas ang mao nga mga bombero.
Tungod sa nahitabo sa 12 nila ka kauban, tulo ka mga fire station ang ilang gi-lockdown. Kini naglangkob sa Pahina Central, Parian ug Mabolo.
Apan iyang gipaneguro nga ang ilang pagtubag og mga alarma sa sunog di maapektuhan.
Matod ni Villanueva nga giabagan sa ilang rehiyonal nga buhatan sa Bureau of Fire Protection (BFP) ang mga nagpositibo sa Covid pinaagi sa paghatag og mga bitamina.
“But I’d like to assure the public nga wala tay angay kabalak-an and it’s still manageable. Atong nahimoan og intervention even if duna na tay naigo sa Covid nga atong mga kaubanan,” matod ni Villanueva.
Matod niya, ang gidaghanon sa mga nataptan sa Covid sa ilang hut-ong di babag sa pagbuhat sa ilang gimbuhaton.
“Duna tay siyam ka mga fire stations ug unom ka sub fire stations. Dugangan pa sa atong mga fire volunteer nga motubag panahon sa sunog,” matod niya.
DI MAGPADUOL
Taliwa sa hulga sa Covid-19, iyang giawhag ang mga residente sa Sugbo nga kon duna man gani sunog sa ilang barangay, di magpaduol aron sila mas makalihok.
Giawhag usab ni Villanueva ang publiko nga di i-discriminate ang mga bombero.
“Kay this is not something nga atong ika uwaw. We must inform the public to know kay basin og dunay sunog, unya dunay mosulti nga unsa man ning bombero nga niresponde man nga naa may nag positive,” pasabot ni Villanueva.
Ang Cebu City Fire Station nagpadayon gihapon sa pagpatuman sa ilang health protocol.
Kon motubag sa alarma sa sunog, kinahanglan nga magpa decontaminate ang tanang firefighters aron makuha kon duna man gali namilit nga virus.
“When the pandemic came in ang tanan nato nga mga fire fighters mo-undergo gyud na sa decontamination process,” dugang ni Villanueva.
NANIRA PUD
Temporaryong gisirado ang Mandaue City Fire Station human adunay usa ka personnel nga nagpakita og simtomas sa Covid-19.
Gianunsyo kini pinaagi sa official Facebook page sa maong estasyon sa Hulyo 2, 2020 ug sa temporaryong pagsira niini ipahigayon ang pag-disinfect sa ilang estasyon.
Matod ni Fire Chief Inspector Bernard Batnag Jr., fire marshal sa Mandaue City Fire Station, nga adunay usa nila ka personnel nga nakasinati og susama sa simtomas sa Covid-19 sama sa hilanat ug sore throat.
Apan, sa diagnosis sa doctor, ang nasinati nga hilanat sa maong personnel tungod sa iyang urinary tract infection (UTI).
Sigon ni Batnag nga ipaubos sa RT-PCR swab test ang maong personnel aron masiguro kon UTI ra ba ang iyang gipamati o nataptan sab siya sa maong virus.
Bisan paman, niingon ang asawa sa maong personnel nga ubos ang posibilidad nga Covid-19 ang maong mga simtomas.
Kasamtangang na-admit sa usa sa mga hospital sa dakbayan sa Lapu-Lapu ang maong personnel.
Isip usa sa mga frontliners linya sa ilang trabaho ang motabang sa pagbantay sa mga border control points sa dakbayan ug daghan sab silang makaatubang nga mga tawo sa ilang trabaho.
Aron sa pagsiguro sa kaluwasan sa ubang mga personnel, temporaryong gisirad-an una ilang opisina samtang magpaabot sa resulta sa swab test sa maong personnel.
Giurong sab una ang mga transaksyon sa ilang opisina.
Dugang ni Batnag nga kon aduna silay mga anunsyo sa mga umaabot nga mga adlaw i-post lang kini nila sa ilang opisyal nga facebook page. (BBT, KFD)