GIDID-AN na ang mga pulis sa Dakbayan sa Sugbo sa pagpahamtang og pisikal nga silot sa mga tawo nga makalapas sa enhanced community quarantine (ECQ) protocol.
Inay pasayawon og Sinulog, push-up, papangadyeon ug uban pa, ipakiha na lang kini og diretso.
Mao kini ang kamandoan ni Police Regional Office (PRO) 7 chief Brigadier General Albert Ignatius Ferro human siya masayod sa gibuhat sa pipila ka mga sakop sa Special Action Force (SAF) sa usa ka 59 anyos nga ginang nga taga Barangay Basak San Nicolas.
Ang ginang nga giingong dunay sakit giingong gipalakaw og mga singko kilometro gikan sa dan Carlock padung sa barangay hall sa Basak San Nicolas niadtong Miyerkules, Hulyo 1.
Giubayan siya sa mga sakop sa SAF.
Wa makauyon si Ferro sa gibuhat sa iyang mga sakop hinungdan nga iya kining ipatawag.
Sa sunod, kon dunay masakpang makalapas sa ECQ protocol ug executive order ni Mayor Edgardo Labella, iya na kining ipakiha og diretso.
Nipahimangno usab siya sa mga pulis nga makalapas.
“Dili to pwede basta any inhuman or not authorized. Ako silang gisultian na you should do away yung mga physical exercise. That’s my directive. You just follow the normal course of apprehension and filing of the case. No more na yung ipa push up. Wala na to. Gipalakaw, wala na to. We will reprimand all those that have been doing the other form of punishment that is not stated in Republic Act 11332,” pagpasabot ni Ferro.
APOR
Awhag usab niya sa iyang mga pulis nga naa sa gawas nga ipatuman ang maximum tolerance ug di lisud-lisuron ang mga authorized person outside residence (Apor), sama sa mga sakop sa media ug ubang frontliners nga mahimong makagawas bisan way quarantine pass.
Usa ka sakop sa media ang gilisodlisod usab sa usa ka sakop sa SAF ning semanaha.
NALIPAY
Ang pangu sa Cebu City Covid Action Team, Raquel Bohol-Arce, nalipay ning mando ni Ferro sa pagkiha sa nga makalapas.
Alang kaniya, mas maayong pasakaan og kaso ang mga makalapas sa mga protocol kay sa silutan og pisikal.
Ang iyang team maoy dad-an sa mga pulis sa ECQ violators aron mapahamtangan og silot nga pisikal sa Plaza Independencia.
“Labing maayo nga pasakaan na gyud og kaso ang mga ECQ violator. Klaro kaayo na nga disobedience to the person in authority. Kon ila pa unta nga gipasakaan, apan naa pud silay reason kay overwhelmed ang mga silda. Pero kon gitinuod pa gyud unta na gikan sa sinugdanan, I’m sure mahadlok gyud na sila,” tubag ni Arce sa Superbalita Cebu.
Ang madakpan sa mga pulis ug dad-on kanila ilang pasayawon og Sinulog, paampuon og rosary, push-up, palimpyuhon ug itangggong nga di molapas og 12 ka oras.
Niangkon si Arce nga lugak ra ang pagsilot sa mga makalapas sa mga protocol, sama sa di pagsul-ob og face mask ug pagdala og quarantine pass.
“Karon ang nahitabo relax kaayo kaayo ta. Unya ang City Ordinance sa July 12 pa moepekto unya moingon ra na sila nga makabuhi ra after 12 hours. I hope lesson learned ni. Nindot kaayo ni nga development for those hardheaded nga ma-file-an gyud sila og kaso,” dugang ni Arce.
NANGTUMAN NA
Nakabantay hinuon ang kapulisan sa dakbayan sa Sugb nga gamay na lang ang nagpabadlong human sa 15 ka adlaw nga gipatuman pag balik ang ECQ.
enhanced community quarantine itandi sa unang semana sa ECQ.
Gihulagway sa officer-in-charge sa Cebu City Police Office (CCPO) Police Colonel Cedric Earl Tamayo nga hapsay na ang tibuok Dakbayan sa Sugbo kon itandi sa unang semana sa pagpatuman sa ECQ.
Matod ni Tamayo nga iyang nabantayan sa mga quarantine checkpoint nga ang mga tawo misunod na sa quarantine protocol ug wa nay nanggawas sa ilang balay nga way quarantine pass.
Nakasabot ra hinuon siya nga sa unang semana, sa subling pagpatuman sa ECQ, nabag-ohan pa ang mga tawo ug wa masayod unsay angay nga buhaton.
“Karon nakita nato no may mga kanya-kanya naman gipangsira. Ang uban nga mga makita nato sa dalan, nga base sa reports sa akong mga station commanders, nga nagasunod naman ang mga tawo. Naka-adjust na pud silag balik ,”matod ni Tamayo.
Nanghinaot siya nga magpadayon na kini hangtod nga malatasan sa mga Sugboanon ang pila ka semana nga gipaubos sa lockdown ang tibuok siyudad aron di na makakatap pa ang Covid-19. (dugang taho ni PAC)