MOPAUBOS sa self isolation si Medellin Mayor Benjun Mondigo human nagpositibo sa coronavirus ang usa ka staff sa iyang opisina.
Kini maoy gipahibawo sa mayor sa official Facebook page sa lungsod.
Matod ni Mondigo nga gawas sa himuon nga pag-monitor sa iyang panglawas, mopaubos usab siya sa swab testing aron masiguro nga luwas siya sa sakit.
"Nag desisyon usab ako nga mag self-isolate sugod karon aron maobserbahan ang panglawas mentras magpaabot sa resulta sa pagabuhaton nga swab test", matod ni Mondigo sa Hulyo 4, 2020.
Gawas niini, ang trabaho sa munisipyo kasamtangan usab nga gisuspenso.
Ang nahisgutan nga pasyente nga staff sa mayor mao ang close contact sa ikaduhang pasyente sa lungsod nga positibo usab sa Covid.
Hinuon nipaubos na sa self isolation ang pasyente una nigawas ang resulta sa pagsulay.
Gawas sa nagpositibong kaso, may laing duha pa usab nga nataptan sa sakit.
Siya mao ang 73 anyos nga lalake, kinsa nagpuyo sa Purok Matias, Barangay Kawit.
Una na kining may gibatyag nga simptomas hinungdan nga dali kining nagpakonsulta sa Cebu Provincial Hospital sa Bogo sa Hulyo 1.
Samtang ang ika tulo mao ang usa ka field manager nga lalake nga taga Barangay Don Virgilio Gonzales.
Nakasinati usab kini og simtomas sa sakit ug nagpakonsulta sa doktor sa Medellin Rural Health Unit sa Hunyo 29.
Kasamtangan nga gipahigayon sa lungsod ang pagsusi sa mga nakahimamat sa mga pasyente ilabi na ang pagpaubos sa swab test sa first generation contacts.
Tungod sa hitabo, gimando ni Mondigo ang pagsuspenso sa tanan nga transaksyon sa munisipyo.
Kini tungod sa pagpahigayon ug disinfection sa tibuok edipisyo ingon man sa mga kasikbit nga government offices, lakip ang pampublikong merkado.
"Ang tanang staff sa Mayor’s Office gimandoan usab sa pag self-isolate una aron makasiguro kita nga dili mokatap ang sakit", matod ni Mondigo.
Kini aron mapugngan ang pagkatap sa kagaw sa palibot.
Sa kinatibuk-an, nakatala na og lima ka mga positibong kaso sa Covid ang Medellin.
Padayon ang panawagan sa mayor sa mga konstituente niini nga kon mahimo dili una mo gawas sa panimalay aron malikayan ang pagkatap ug pagkatakod sa sakit.
"Ipadayon nato ang pag-ampo sa Ginuo nga ang mga nagpositibo sa sakit maayo sa labing dali nga panahon.
Dili sila angayan i-discriminate. Ato sila nga tabangan sa pag-ampo." (ANV)