“SHARE your blessings.”
Mao kini ang nabatasan sa magtiayon nga Francis ug Julie “Tata” Cabalda.
Ang duha bag-o lang nagsaulog sa ilang adlaw nga natawhan ug ika-17 nga anibersaryo sa ilang kaminyuon.
Niadtong Abril ning tuiga, dihang unang gipaubos sa enhanced community quarantine ang siyudad sa Sugbo, nanghatag sila si Francis ug Tata og mga sinako sa bugas humay, noodles, mga delata nga pagkaon ug uban pa.
Apil sa mga nakadawat ang ilang pito ka mga drayber, tigbantay sa parkinganan sa ilang mga public utility jeepneys, mga kabanay ni Francis ug mga higala sa magtiayon.
Sumala ni Tata paagi kini nila sa pagtabang sa mga tawo nga nangaapektuhan ang panginabuhian gumikan sa gipatuman nga ECQ nga epekto sa Covid-19 diin way publikong mga sakyanan ang gitugotan nga makabiyahe.
Niadtong Hulyo 4, gisaulog ni Tata ang ika-38 nga kasumaran sa iyang adlaw nga natawhan.
Pasado alas 5:00 sa buntag gipukaw si Tata og Mañanita ni Francis ug sa ilang duha ka mga anak nga mga lalake nga sila si Charles David ug Josh Moises.
Usa ka simple nga salosalo sa pamilya ang nahitabo pagka gabii sa samang adlaw.
Apan sa wala pa ang panihapon, nihapit una sila sa simbahan ug nanimba. Gibutyag ni Tata nga manghatag na usab sila og laing hugna sa bugas ug mga delata nga pagkaon alang sa mga nanginahanglan.
“It is not only the thought of giving I am into, it is the feeling I felt when I gave. It’s food for the heart for me. We are only returning God’s favor by sharing our blessings to others,” matod sa batan-ong asawa.
Apil sa wishes ni Tata sa iyang birthday nga padayon makabaton og maayo nga panglawas ug luwas kanunay ang ilang pamilya batok sa Covid-19 ug ubang balatian. (SCG)