SUPERBALITA CEBU

Diola: Gikapoy na ka?

Mao diay

Binasi sa Zacarias 9:9-10; Salmo 145; Taga-Roma 8:9, 11-13; Mateo 11:25-30

LAINLAIN ang rason kon nganong daghan kanatong gikapuyan. Daghan sa atong medical frontliners gipangkapoy intawon kay nagkaanam og kadaghan ang mga nagpositibo sa Covid-19 nga ilang gigalam. Daghang atimanunon, lakip na ang kaugalingon aron dili mataptan. Dili pod lalim nga mosul-ob sa gitawag nga PPEs kay alimuot ug sambol.

Dili pod lalim ning mag-estar lang sa balay. Gabalikbalik ang “routine” sa sulod lamang sa limitado nga luna. Moabot gyud ang kalaay ug kakapoy. Tinuod may social media ug zoom, apan dili tanan hanas niini. Unya lahi gyod ning may kaatubang nga tawo, dili lang “gadget screen”.

“Umari kamo kanako, kamong tanan nga gikapoyan ug gibug-atan, ug papahulayon ko kamo,” nagaingon si Jesus. “Pas-ana ninyo ang akong yugo ug pagkat-on kamo gikan kanako, kay maaghop ako ug mapaubsanon sa kasingkasing, ug makakaplag kamo og kapahulayan sa inyong mga kalag,” nagpadayon siya.

Ang kakapoy nga giagian sa mga Judio sa panahon ni Jesus mao ang kakapoy sa pagsunod sa daghan kaayong balaod kansang pagsabot anaa sa mga kamot sa mga Pariseo ug uban pang kadagkoan sa relihiyon. Daghan kaayong hunahunaon ug sagad nahikalimtan na ang orihinal nga tumong sa balaod, sama sa pagluwas sa kinabuhi sa tawo. Naputol ang maong mga kasugoan sa buhing gamot sa relihiyon.

Ang “yugo” nga gihisgotan ni Jesus mao ang pagtuo ug pagsunod kaniya. Siya ang buhing gamot sa pagsunod sa mga pagtulon-an ug kasugoan sa relihiyon. Makapagaan siya tungod sa iyang Diosnong gugma nga nakalupig sa kamatayon diha sa pagkabanhaw ni Jesus.

Gimandoan ni Jesus ang iyang mga apostol sa pagpahulay bisan sa makadiyot. Nakasabot siya sa kakapoy ni Simon ug mga anak ni Zebedeo sa dihang namahulay sila samtang nag-antos si Jesus sa tanaman sa Getsemane. Gitandi niya ang tinuoray nga pahulay sa mini nga pahulay nga binasi sa katagbawan lamang sa lawasnon nga pangandoy sama niadtong hungog nga dato nga midamgo sa iyang pahulay apan namatay nga wala niya kini mapahimusli.

Ang tinuoray nga pahulay diay mao ang pagdumala ni Jesus sa atong kinabuhi. Gitagna ni propeta Zacarias si Jesus nga “balion niya ang mga pana, ug hatagan og pakigdait ang kanasoran”. Panagdait ang gidala ni Jesus isip langitnong gasa nga madawat nila nga motuo kang Jesus.

Midugang pa si San Pablo nga ang Espiritu nga nagbanhaw kang Jesus mao say mohatag og kinabuhi sa mga tumutuo ni Jesus. Dili utangan ang Kristohanon sa unod nga ang padulngan kamatayon kondili gibayran na kini diha sa Espiritu. Makapahulay kita kay giluwas na kita. Dili hayahay na lang kanunay ang kinabuhi sa Kristohanon, kay daghan pang mga hagit, apan ang gipanukaran klaro ug solido.

Makabaton diay kita og kapahulayan atubangan sa daghang hagit sa panahon sa Covid kon tugotan nato si Jesus nga magdumala sa atong kinabuhi. Nagdumala na ba siya sa atong hunahuna, kinaiya, bulohaton, “routine”, ug uban pang aspeto sa atong kinabuhi?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph