WALAY nakapugong sa administrasyon karon sama sa nahitabo kaniadtong naghari ang diktaduriyang Marcos. Gipirmahan na ni Presidente Rodrigo R. Duterte ug nahimo na kining “Anti-Terrorism Law.”
Dunay mga tawo nga intelehenteng nidepensa sa maong balaod. Angay respetahan and ilang opinyon. Dili sila angay ipareho nianang mga bogo nga moingon, ang wala mosuporta sa Anti-Terrorism Bill pulos terorista.
Usa sa gikahadlokan karon ang pamasangil nga usa ka terorista kining tawo nga nagsigi og panaway sa administrasyon diha sa Facebook. Gidakop man gani ang filmmaker nga si Bambi Beltran tungod sa iyang pagkomentaryo sa kahimtang sa Barrio Luz.
Mahimo sab nga ehemplo ang pagdakop niadtong pito sa UP Cebu samtang wala gyud panumbalinga sa kapulisan ang mass gathering sa MCWD Social Hall niana gihapong adlawa.
Nabalaka ko kay ang pagpanakop ginamit ang maong balaod mao man ang kapulisan. Wa pa gyud ko makalimot nga usa ka doctor wala palutsa dayon sa police checkpoint kay ila pang tinuon kon ang usa ba ka doctor kining physician ang nasulat sa ID.
Ang labing ulahing nahitabo mao kining hapit pagsikop ni Sheriza Mae Uy, usa ka tigbalita sa Banat News, sister publication sa The Freeman. Mao kini ang among kompetensiya nga mantalaang Bisaya nga nagbase sa Syudad sa Sugbo.
Ambot kon ngano nga ang kapulisan, sakop sa Special Action Force nga gipadala sa Sugbo, wala man motahud sa ID niya. Maayo na lang kay dunay laing police official nga nakaila niya personal.
Wa pa lagi kana mahitabo apan kuyaw. Ug kon masikop kay gidudahang terorista, mahimo kang prisohon ngadto sa 14 ka adlaw nga walay kiha.
Nakahinumdom gyud ko sa pagsugod sa giingong drug war ni Presidente Duterte. Maayo ang tinguha nga sumpuon ang drugas. Apan ang niduso sa maong gubat mao ang kapulisan.
Daghan pa kining mga detalye nga sa akong pagtutok sa Covid-19, wa na kaayo nako matun-i.
Nasiguro ko nga kining mga human rights lawyers modangop dayon sa Korte Suprema sa labing madaling panahon.
Sa atong pagbanabana, mahitabo kana karong Lunes kay tayming nga Biyernes napirmahan ang balaod.
Taas-taas pa kining maong isyu kay nasiguro ko mao kini ang mahimong isyu gawas niining palpak nga pagdumala sa pandemic.
QUARANTINE PASS
Hinuon, kon maghisgot kitag pass, murag walay makalabaw sa pagka-amaw kining pagbutang og QR Code nga imbes basahon og usa ka app aron matino kon apil imong ngalan sa usa ka database, hinulon man sa pulis.
(@anol_cebu sa Twitter)