DAGHAN ang misaway kang Cebu City Mayor Edgardo Labella nga huyang iyang liderato sa pagpakigbatok sa coronavirus disease (Covid 19) hinungdan nga gibutang ni Presidente Rodrigo Duterte si Department of Environment and Natural Resources (DENR) Secretary Roy Cimatu isip Covid 19 response overseer dinhi sa Central Visayas ug Sugbo.
Ang mga kritiko ni Labella nagkanayon nga wala na siyay gahum ug dili na makabuot-buot pagpagawas sa iyang mga desisyon. Si Cimatu na ang nagmando sa tanan ug nahimo na lang ‘second class citizen’ si Labella. Sa laktod nga pagkasulti wala na siyay awtoridad o gahum.
Dili baya sab siguro. Si Mayor Labella mao gihapoy mayor ug accountable sa mga lumolupyo ning dakbayan isip pinili nga pinakataas nga opisyal. Matawag siguro nato nga collaboration ug cooperation ang ilang liderato ni Cimatu sa Covid response.
Bisan tuod og adunay mandatu si Cimatu gikan kang Pres. Duterte, apan adunay dili mahimo ni Cimatu ug gikinahanglan siyang mo- cooperate ni Labella. Si Cimatu dili makapagawas o makaisyo og mga executive order. Sumala sa executive orders karon, si Labella gihapon ang mipirma.
Aduna say mahimo si Cimatu nga dili mahimo ni Labella kay ang territorial jurisdiction sa mayor kutob man lang sa dakbayan. Sama aning augmentation sa kapulisan ug militar. Ang Cebu City Police Office (CCPO) director ra ang mamanduan ni Labella kay mao may ubos sa iyang operational supervision and control. Labaw sa CCPO sama sa regional level, mohangyo na siya sa regional office. Mao sab sa military ug ubang national government agencies, sama sa Department of Health (DOH).
Apan si Cimatu makahimo ani dayon uban sa pagpakig-alayon sa department secretaries kay aduna man siyay mandatu gikan sa Presidente. Mao na nga adunay mga augmentation sa kapulisan ug militar dinhi sa dakbayan. Aduna pay doctors ug nurses nga gipadala dinhi. Dili sab puwede masurender ni Labella ang iyang gahum kay siya man maoy lehitimong gipili sa mga Sugboanon.
(bobbygnalzaro@gmail.com)