GIHATDAN og show cause order sa Cebu City Legal Office ang kapitan sa Barangay Basak Pardo human adunay naghantak sa usa ka sityo niadtong Biyernes, Hulyo 3, 2020.
Gitagalan og 24 ka oras si Basak Pardo Barangay Captain Catalina Cabardo aron pagtubag sa show cause order.
Niadtong Hulyo 3, nikatap sa social media ang mga hulagway nga nagpakita sa mga residente nga nagsugal ug nagtapok.
Base sa nakuha nga reports sa CLO, ang sugal nahitabo sa Sitio Ulap nga giapilan sa 15 ka mga residente.
Kon makita nga adunay pagkuwang si Cabardo, mamahimo siya’ng mag-atubang og dereliction of duty and gross negligence nga pwede makasuspende niya isip kapitan sa barangay sa unom ka buwan, matod ni City Attorney Rey Gealon.
Sa pakighinabi kang Cabardo, nibutyag ang kapitan nga wala smasayod ang barangay sa mao nga panghitabo ug nakahibaw lamang siya niini sa social media.
Matod niya nga pagkahibaw sa barangay hapon sa Hulyo 3, dali-dali niya nga gipaadto ang tanod sa sityo, apan wa na didto ang mga nagsugal.
“Naa unta nato nang pagsinabtanay, pagtinabangay kay kita ra gihapon sa barangay ang mag-antos, atong pamilya ra gihapon ang mag-antos,” siya niingon.
Nihangyo na si Cabardo nga pun-an ang kapolisan sa ilang barangay tungod kay 10 lang kabuok ang ilangmga tanod.
Mintras wa pa ang dugang nga security forces, nagbutang si Cabardo og tanod sa lugar.
Matod sa show cause order nga responsibilidad sa barangay captain ang hugot nga pagpatuman sa mga protocol ug polisiya samtang ang dakbayan ubos pa sa enhanced community quarantine (ECQ).
Matod ni Gealon ang maog pagtapok tapok kay nakalapas sa executive order nga giisyu sa Cebu City Hall ug sa polisiya sa national government.
Nihangyo sab si Cabardo sa mga residente sa iyang barangay nga biyaan ang pagsugal ug mosunod sa mga polisiya nga kanunay gipahinumdum sa barangay pinaagi sa mga rekoreda nga gihimo.
Si Cabardo mao ang ikaduha nga barangay official nga gipadad-an og show cause order sa City Hall samtang laing duha gipadad-an usab sa Department of the Interior and Local Government tungod sa mga kalapasan sa quarantine protocol. (JJL)