GIKINAHANGLAN pa unta ang igong panahon sa pagtuki sa Anti-Terrorism Act of 2020, apan napalabang kini sa Ubos Balay-Balauranan nga nituki sa balaud sulod lang sa duha ka mga adlaw.
Si Cebu City south district Representative Rodrigo Abellanosa nagtuo nga mapalambo pa unta ang mga probisyon niini kon ang Ubos Balay Balauranan gihatagan og igong panahon sa pagtuki niini.
Si Abellanosa wa mobotar sa balaud kay nabalaka siya sa pagpanalipod sa batakang katungod sa katawhan.
Iyang gibutyag nga ang Ubos Balay Balauranan igo rang gihatagan og duha ka mga adlaw sa pagtuki sa balaud.
“...I believe it could have been improved to address sensitive issues and provisions if the House of Representatives was given more time than just two days to deliberate it,” matod ni Abellanosa.
Ang Anti Terrorism Act gipirmahan ni Presidente Rodrigo Duterte aron mahimong balaud sa miaging adlaw.
Karon nga nahimo na kining balaud, matod ni Abellanosa nga mahimo nang makwestyon kini sa Korte Suprema kon nahasubay ba kini sa batakang balaud.
Sa nangaging interbyu, si Cebu City north district Representative Raul del Mar nagtuo nga ang umaabot nga kongreso makagamit sa iyang gahom sa oversight kon ang balaud abusahan.
“And confident that our judicial system will uphold their sworn duty of interpreting the letter and spirit of the Constitution and defending our democratic institutions,” matod ni del Mar. Si Del Mar nibotar pabor sa balaudnon apan duna siyay panagana.
MAPANALIPDAN?
Samtang si Police Regional Office (PRO) 7 Director Brigadier General Albert Ignatius Ferro nagtuo nga ang mao nga balaud manalipod sa katawhan gikan sa hulga sa mga terorista.
Iyang gipaneguro nga di angay mabalaka ang publiko sa mao nga balaud kay duna kini mga probisyon nga manalipod sa publiko gikan sa mga pangabuso sa mga awtoridad. (JJL, AYB)