GIAWHAG sa lokal nga kagamhanan sa Dakbayan sa Mandaue ang ilang mga konstituwente nga manawag sa fever clinics kon makasinati og simtomas susama sa coronavirus disease (Covid-19)
Bisan pa man nga ang mga simtomas susama lang sa ordinaryo nga trangkaso o flu, giawhag gihapon kini nga manawag sa fever clinics.
Matod sa Facebook post sa Mandaue City Public Information Office nga kon makasinati og hilanat, ubo, sip-on, soar throat, pagkalibanga ug pagwagtang sa panlasa ug panimaho, motawag dayon sa fever clinic sa ilang barangay.
Ang tanang 27 ka mga barangay sa dakbayan adunay focal person sa ilang fever clinic nga motubag sa mga tawag niining mga konstituwente nga nakasinati sa maong mga simtomas. Kini aron ma-schedule alang sa check up ug kinahanglan nga magpahibawo nga nakasinati na og mga simtomas una moadto sa fever clinic aron sa check up.
Di na kinahanglan pa nga mograbe ang kondisyon una kini moadto sa fever clinic.
Sa pakighinabi sa Superbalita Cebu ni Atty. John Eddu Ibañez, executive secretary ni Mandaue City Mayor Jonas Cortes, nga bisan pa nga ang Dakbayan misuporta sa tuob o "steam inhalation", ang maong remedy di nagpasabot nga makaayo kini sa Covid-19 kon mataptan niini.
Gipasabot ni Ibañez nga traditional lang kini nga remedy aron mohupay sa mga simtomas ug di pasabot nga mao kini ang tambal sa virus.
Hinungdan nga kinahanglan nga magpa-check up aron masuta kon ang mga simtomas normal lang nga trangkaso o Covid-19.
Mamahimong makontak ang mga focal person sa kada barangay sa dakbayan sa Mandaue sa contact number nga gipost sa Facebook page sa Mandaue City Public Information Office. (KFD)