GIKABALAK-AN sa mga health expert sa Estados Unidos nga moabot og tag 100,000 ka mga tawo ang matakdan kada adlaw sa Covid-19. Sa pagkakaron, naa pa sila sa 50,000 kapin ka infections matag adlaw kun sud lang sa 24 oras.
Ang usa sa mga hinungdan niini ang mapasagaron nga lihok sa mga batan-on sa Amerika taliwa sa pagbukas og balik sa mga bar. Naa pay grupo nga nagtanyag og premyo sa labing unang matakdan sa Covid-19. Grabe na ka level up ang ilang kabuang.
Kini nga mga buhat sa mga batan-on sa pipila ka mga estado sa Amerika maoy nakapabalaka sa ilang health experts kay kon magpadayon, ang 100,000 infections sud sa 24 oras di layo nga mahitabo. Dinhi sa Pilipinas, tag 1,000 na kapin ang magpositibo sa Covid matag adlaw.
Wa pay tino nga rason kon nganong nipaspas og balik ang mga pagpanakod sa kagaw sa Covid-19. Apan daghan sa mga nasod nga nangbukas og balik, sama sa China, nakakita sa ikaduhang wave sa pag-atake sa Covid-19. Kay bukas na man ang mga komunidad ug duna nay interaction sa mga tawo, nibalik pagpanaghan ang mga positibo.
Dinhi sa Cebu City, tag 100 kapin ang magpositibo matag adlaw karon nga gipailawom ang siyudad sa enhanced community quarantine. Dunay pagtuo nga ang pagsaka nagagumikan sa paglugak, niadtong nag general community quarantine pa ang siyudad.
Ang social distancing, pagsul-ob og face mask ug pagpanghunaw kanunay sa mga kamot namatud-an nang epektibo. Sa Japan, minos ra ang mga pagpanakod kay ang mga tawo didto di na hapit mag-estorya. Gilikayan ang panagtapok ug kukabildo samtang nagpadayon pa ang hulga sa Covid. Ingo ana sila ka disiplinado.
Di pareho dinhi sa atoa nga mag-disco, mag Sinulog, magtigbakay. Ang gikinahanglan ra gyud unta ang pagtuman sa mga protocol aron mahuman na ang pag-antos sa katawhan. Magdisiplina sa kaugalingon.