SUPERBALITA DAVAO

Genoguin: Anti-Terror bill, balaud na

KONTRA BALANSE

DAGHAN ang nagkwestiyon kay daghan ang nahadlok kon mahimong balaod ang Anti-Terrorism bill tungod kay dili ikalimod nga adunay nasupak diha sa Article 3 sa Bill of Rights sa atong 1987 Philippine Constitution o batakang balaod.

Pero tungod kay urgent bill, buot-pasabot dinalian nga balaudnon, gikan sa Malakanyang ug kadaghanan sakop sa majority ang mga membro sa Senado, sa katapusan kini na-aprobahan ug nahimo nang Republic Act 11479.

Taas na kaayo kung ato pang tagsa-tagsaon ang mga unod sa maong probisyon, pero dinhi nalang kita mosentro sa "WARRANTLESS ARREST" tungod kay mao kini ang gikahadlokan sa mga eksperto sa balaod kay gamiton lang kini siya kon ang atong nasud anaa sa emerhensiya, sama sa pagdeklara og Martial Law, kay dili na kinahanglan ang korte kung ang mga kaaway sa estado mao na’y nagdaghan sa atong palibot, sa laktud? Emergency.

Apan sa atong sitwasyon karon, matud pa’s mga eksperto, wala kini kinahanglana kay dili kita ubos sa Martial Law, ug gikinahanglan ang proseso sa usa ka tawo nga gikatahapan nga may kalambigitan siya sa kalihukang terorista.

Walay korte nga makapanghilabot kon kinsay gustong arestuhon sa mga otoridad, kay ang warrant of arrest gikan sa Anti-Terrorism Council (ATC) nga gilagkuban sa walo ka membro sa gabinite ug ang pinkataas mao ang Executive nga mao ang presidente.

Kon nahinumdom kamo, panahon sa Martial Law adunay Arrest Search and Secure Order nga gikan mismo ni Presidente Ferdinand Marcos ang mando sa pag-aresto, apan gideklara kato sa Korte Suprema nga ilegal.

Si Presidente Rodrigo Duterte dili abusador, sama kang diponto Presidente Marcos, apan ang nag-abuso mao ang police ug military ug naturalmente, ang commander-in-chief nga mao ang maigo sa mga isyu ug mga pagdumot sa mga lungsuranon.

Mosugot kita ug sa dili, basta gikan sa ehikutibo kun presidente, may bahid gyud nga politika ug mahimo kining gamiton sa pamolitika sa mga politiko nga anaa sa gahom aron magpabilin sila sa pwesto.

Walay sapayan kang Presidente Duterte kay pagawas naman siya sa posisyon. Dili man kita panahon sa Martial Law? Nganog dili man nato pasagdan ang korte nga maoy naghagilap sa sinumbong kon siya ba nakahimo sa maong salaod, o wala?

Maayo unta, kon kining balaora kay nia naman gyud ni? Malampurnas na unta ang pagdakop sa mga rebeldeng New Peoples Army kay wala naman na silay idolohiya nga gipaglaban karon.

Ug ang mga grupo sa Abu Sayaff maoy maaresto niining balaora kay sila man gayud ang tinuod nga terorista ug malipay niana ang mga katawhang Pilipino.

Tungod kay balaod naman gyud ni siya, manghinaut kita nga matinuod ang gipangyawyaw ni Senador Panfilo Lacson nga dili kini anti-kawsa, dili kini anti-protesta kay bisag maglagot ta nianang legal nga organization sa kumunista nga magsige og martsa-martsa sa atong kadalanan, gitugutan pud na sila sa atong batakang balaod.

Lakip na gani ang mga kawani sa atong gobyerno, sa malinawong paagi gitugutan sila nga magprotesta nga gigarantiya sa atong 1987 Constitution, hinaot nga kadto lang inciting terrorist ug terorista maoy mabiktima niining balaora, kay wala naba’y jurisdiction ang atong korte sa pag-aresto, hinaut nga dili kini maabuso nga balaod.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph