SUPERBALITA DAVAO

Mamalaye na tungod sa virus

Hulagway iya ni Daphne Jane Labiton Cabilao

JOSE ABAD SANTOS, Davao Occidental -- Pagbati sa duha ka mga batan-on gitagbo sa dihang na-quarantine sa isolation facility sa Faustino K. Labiton Elementary School (FKLSES) sa Barangay Carahayan sa lungsod.

Gisulod sa isolation facility niadtong Hunyo 16, 2020 sila si Mirasol Miguel, 17, ug si Jiel Miguel, 22, sa dihang nanguli gikan sa gawas sa probinsiya aron nga i-quarantine.

Subay sa sugilon ni Daphne Jane Cabilao, usa sa mga staff sa isolation facility, nasayran nga gikan sa General Santos City si Jiel kinsa molupyo sa Barangay Tabayon sa JAS samtang taga Barangay Carahayan sab si Mirasol nga gikan sa Davao.

Apan wa gitago sa lalaki nga nahigugma siya sa babaye bisan sa una pa lang nilang panagkita.

Namatikdan sa mga anaa sa pasilidad nga sa paglabay sa duha ka adlaw daw aduna na kini relasyon.

Nabulabog ang panaghinigugmaay sa duruha dihang mihangyo na si Jiel sa iyang igsuong lalaki nga mohulam og gitara kay iyang haranahan ang babaye.

Kini maoy hinungdan nga daling nakuha ni Jiel ang gugma ni Mirasol, ilabi na nga unang boyfriend niya kini.

Matud ni Cabilao nga usa ka Kristiyano ang ulitawo ug bisan mga barangay tanod nga nagbantay sa lugar nakamatikod nga hilabihan ang ka-sweet sa duruha, mao nga igo na lang sila sa pag-ingon nga "sana all."

Samtang, si Mayor John Jason Joyce nagbutyag nga human ang 14-adlaw nga kwarentinas ug way nakitang sintomas sa coronavirus disease (Covid-19) sa managtrato, nigawas na sila sa pasilidad niadtong Hulyo 2.

Gilayon sab nga nagsabot ang pamilya sa duruha ug sanglit gitugtan sa tribung Manobo ang sayong kaminyuon bisan menor de edad pa. Gihuwat na lang karon ang petsa sa pamalayi tungoddi na kapugngan sa mga ginikanan ang nag-uros-uros nga gugma sa ilang mga anak.

Sanglit paspas pa sa pagkuyanap sa kagaw ang gugma sa managtrato, nanghinaut na lamang ang mga nakasaksi sa panaghigugmaay ni Jiel ug Mirasol nga mahimong "happy ending" ang tanan.

Mapasalamaton sab ang managtrato sa Covid-19 kay dili tanang epekto niini negatibo human ilang napamatud-an nga gugma ang napadulngan nila sulod sa FKLSES isolation facility.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph