MOKABAT ngadto sa 2,500 ka mga drayber nga miyembro sa transportation sector sa dakbayan sa Mandaue ang nakadawat sa grocery packs niadtong Sabado, Hulyo 4, 2020.
Sa Facebook post sa Mandaue City Public Information Office, ang lokal nga gobyerno sa Mandaue nga gipangulohan ni Mayor Jonas Cortes nag-apud-apod og grocery packs pinaagi sa Sectoral Affairs Office (SAO) sa Mandaue City Cultural and Sports Complex.
Tungod wala pa tugoti sa Department of Transportation (DOTr) ug sa lokal nga gobyerno sa Mandaue ang pagbiyahe sa jeepney drivers, pinaagi sa grocery packs makatabang kini sa pamilya sa drivers sa ilang inadlaw-adlaw nga konsumo.
Sa pag-apud-apod, mapasalamaton ang mga driver nga nakadawat sa gamayng hinabang gikan sa dakbayan gani bisan paman sa panghitabo nagtan-aw gihapon ang gobyerno sa ilang sitwasyon.
Padung na moupat ka buwan nga wala na makabiyahe ang jeepney drivers sukad gipaubos sa community quarantine ang dakbayan.
Sa laing bahin, ang Public Employment and Service Office (PESO) sa dakbayan sa Mandaue miawhag sa mga nawad-an og panginabuhi sa panahon sa krisis, nga moadto sa ilang opisina aron mo-apply og mga trabaho.
Daghang mga kompanya nga nangita og mga trabahante sama sa bus drivers, konduktor, production workers ug uban pa.
Bisan kinsa mamahimong maka-apply sa maong mga bakanteng trabaho ug kinahanglan lang kini mobisita sa ilang opisina.
Ang opisina sa PESO nahiluna sa ikatulong andana sa Mandaue City Cultural and Sports Complex ug abli kini gikan sa Lunes ngadto sa Biyernes, alas otso sa buntag hangtod sa alas singko sa hapon. (KFD)