BATBANGON, Leyte - Konsehal sa lungsod sa Babatngon, Leyte ang nasikop sa anti-illegal drug operation sa kapulisan ug Philippine Drug Enforcement Agency (PDEA) 8, alas 7:40 sa buntag, Biyernes, Hulyo 3, 2020.
Giila ang dinakpan nga si Ceasar Bergula, 52, minyo, taga Poblacion, Babatngon, Leyte.
Base sa report sa Police Regional Office (PRO) 8, usa ka high value target ang suspek gumikan sa iyang posisyon ug naapil sa negusyo sa ilegal nga druga.
Hiniusang pwersa sa kapulisan sa Leyte Provincial Drug Enforcement, Provincial Intelligence Branch, Babatngon Police ug PDEA ang milusad sa operasyon.
Usa ka poseur buyer ang nakigtransaksyon sa suspek gamit ang P5,000 nga salapi bugti sa usa ka medium size nga pakete sa gituohang shabu.
Sa dihang nagpositibo ang tuyo sa kapulisan, dali kini gipalibotan sa mga awtoridad ug gisikop.
Uban sa barangay official, media ug representante sa Department of Justice, gipahigayon ang pagrekisa.
Nakuha sa posisyon sa konsehal ang dugang large size nga pakete sa gituohang shabu nga nagkantidad og P240,000.
Gidala sa kustodiya sa PDEA 8 ang dinakpan ug ang mga nakuha nga ebidensya.
Ipaubos sa qualitative ug quantitative test ang mga nakuhang gituohang shabu samtang, giandam na ang mga papeles sa pagpasaka og kaso batok sa konsehal. (JKDP)