GAWAS sa pagpalig-on sa immune system, ang pag-atiman sa kahimsog sa pangisip usa sab ka paagi sa pagbatok sa coronavirus disease, ingon ni Edwin Jumao-as, usa sa mga nakarekober sa Covid-19 ug ang pangu sa Mandaue City Legal Enforcement Unit (MCLEU).
Si Jumao-as, usa sa mga Mandauehanon nga nagpositibo sa IgG/IgM rapid antibody test niadtong Mayo.
Human,gipaubos sab siya sa RT-PCR swab test ug nagpositibo ang resulta niini.
Gi-quarantine dayon si Jumao-as ngadto sa isolation area sa dakbayan sa Mandaue aron ipalayo siya sa iyang pamilya.
Sa iyang linya sa trabaho isip usa ka frontliner, dili malikayan nga aduna siyay kontak sa lainlaing mga tawo.
Si Jumao-as ug ang mga kawani sa MCLEU mao ang nagseguro nga ang tanan nga direktiba gikan sa lokal nga gobyerno gipatuman sama sa pagsul-ob sa face mask, pag-obserbar sa social distancing protocol, pagsul-ob sa mga quarantine pass sa mga pampublikong lugar, clearing operation ug uban pa.
Sa panahon sa iyang pag-quarantine, dili malikayan nga makasinati siya og diskriminasyon labi na ang iyang pamilya. Giangkon niya nga ang diskriminasyon makadugang sa bug-at ug kahadlok nga gibati sa pasyente gani, makapahuyang sab kini og samot sa mga pasyente nga moaway sa Covid-19.
Sa iyang kasinatian, ang paglig-on sa iyang mental health pinaagi sa dili paghunahuna sa diskriminasyon ug negative vibes, nakatabang niya og dako.
Nahimo niya ang ihan-ay ang iyang hunahuna ug gidasig ang iyang kaugalingon nga makarekober gikan sa maong sakit.
Uban niini, gipalig-on niya ang iyang immune system pinaagi sa pagkaon sa mga prutas nga adunay Vitamin C, ehersisyo, ug pagtuob.
Ang ‘steam inhalation” o tuob usa ka tradisyonal nga remedyo alang sa mga sintomas sa trangkaso apan, ang Department of Health (DOH) wala mag-endorso sa paggamit sa tuob aron pagtambal sa Covid-19.
Gawas sa paglig-on sa iyang mental ug pisikal nga kahimsog, gipalig-on usab niya ang iyang pagtuo sa Diyos.
Niadtong Hunyo 15, 2020, nagnegatibo na ang resulta ni Jumao-as sa iyang confirmatory swab test.
Karon, nibalik na siya sa trabaho ug nagpadayon sa pagtrabaho isip usa ka frontliner.
Isip usa sa mga nakarekober sa maong sakit, gidasig niya ang ubang mga pasyente nga Covid-19 nga magmadasigon ug dili mawad-an sa paglaum tungod mamahimo pang maayo bisan nataptan na sa maong sakit. (KFD)