PANGULO sa kapulisan lukop nasod nagtinguha nga mapadali ang pagkatukod sa RT-PCR molecular laboratory nga mobalor sa P10 million aron makatabang sa pag-swab sa frontliners nga nakigbatok sa coronavirus disease 2019 (Covid-19).
Usa ka semana na ang nakalabay, gisugdan ang pagtukod sa molecular laboratory alang sa himuon nga swab test.
Matod ni Police Brigadier General Albert Ignatius Ferro, hepe sa Police Regional Office (PRO) 7, ang Philippine National Police pinaagi sa pagtugot ni PNP Chief Police General Archie Francisco Gamboa migahin og P10 million alang sa maong pasilidad.
Gitinguha nila nga mahuman kini sulod sa usa ka buwan aron didto na himuon ang covid testing sa mga police ug ubang tinugyanan sa balaod lakip na ang ubang frontliners nga padayon nga nakigbatok sa corona virus disease.
“Instruction nya strictly implement ECQ and he ask me to fast track the construction of the molecular laboratory of PRO 7 to help to capacitate ang atong PRO 7 naay own RT-PCR molecular laboratory. So we could help our personnel be secured at the same time, we could help Cebu City check other individuals suspected of Covid-19,” matod ni Ferro.
Nanawagan karon ang PRO 7 sa mga Sugboanon nga mga pathologist o kaha mga medical technologist nga mo-apply aron sila na ang mopadagan sa RT-PCR molecular laboratory aron dili na sila mo-hire sa laing lugar sa nasod.
Matod ni Gen. Ferro, mahimo sila nga mosulod sa PNP organization sa ingun niini dili na maglisod sa pagpangitag mga personnel nga maoy modumala sa maong laboratory.
“I’ll take this opportunity na kung naay mga pathologist diri sa Cebu na eligible, amo silang i-recruit sa police, mga medtech nga gustong mag-police. Amo silang i-recruit para sila na mag-man kining atong RT-PCR mga taga Cebu para dali lang nga dili nata mag lisud nga taga layo pa nga region ang atong kuhaon,” dugang ni Ferro.
Samtang sa kapin 70 ka mga police sa dakbayan sa Sugbo nga nagpositibo sa coronavirus, 35 niini ang naka-recover na ug gitakda na sila nga makabalik sa ilang naandan nga trabaho.
Matod ni Police Colonel Cydric Earl Tamayo, officer in charge sa Cebu City Police Office, paspas ang pagkaayo sa mga police tungod kay taas usab ang ilang immune system apan kinahanglan pa gihapon sila nga obserbahan nga dili matakdan pagbalik.
“Taas ang ilang immune system okey so, ginadala dayon sa Taptap kay another sila didto 7 to 14 days for recovery kay dili man common nga negative na ibalik dayon sila. They have to undergo a recovery days pa gihapon para safety pag balik,” matod ni Tamayo.
Malaumon ang kapulisan sa siyudad nga sa mosunod nga mga semana ang tanang police nga gipaubos sa isolation mangaayo na sa coronavirus. (AYB)