7 ka sundalo sa NegOr gikan sa Sugbo, positibo sa Covid-19

PITO ka mga sundalo ang gipaubos na karon sa quarantine sa Negros Oriental human nagpositibo sa Covid-19 dihang migawas ang ilang resulta niadtong Hulyo 3, Biyernes, gikan nagserbisyo sa dakbayan sa Sugbo.

Matod ni Col. Noel Baluyan, commander sa 302nd Brigade 4th ID nga nakabase sa Tanjay City, Negros Oriental, ang pito uban sa 37 nga gipadala sa Sugbo.

Nunot na sa kamanduan sa ilang labaw, dihang padayon ang pagsaka sa nataptan sa virus sa pipila ka mga barangay sa siyudad sa Sugbo.

“Last week of March ata yon na nagpadala kami nang tropa diyan sa Cebu at itong June lang ang kanilang pagbalik dito sa Negros,” matod ni Baluyan.

Ang 37 ka mga sundalo nakabalik sa Tanjay City niadtong Hunyo 23, samtang tulo ka adlaw niana gikan sa ilang pag-abot, dunay mga sundalo nga nakasinati sa sintomas sa Covid-19.

“We immediately coordinate the Negros Provincial Hospital as well as the IATF here so that ma-test dayon sila,” sigon ni Baluyan.

Pito ang nigawas nga positibo base sa resulta samtang ang nahibilin nga 30 gipaubos na usab sa swab test niadtong milabay nga adlaw ug paaboton lang ang resulta niini.

“We will wait for their results while those men na kaka swab test lang doon lang muna sila sa battalion, wala na man masyado mga tao, while yong pito andon na sa provincial hospital,” dugang ni Baluyan.

Ang 37 ka mga sundalo nagsilbing kaabag sa Cebu City Police Office (CCPO) niadtong nagsaka pa ang kaso sa Covid-19 samtang sila ang nagpatrolya sa mga barangay nga dunay taas nga kaso.

Nakabalik lang ang mga sundalo dihang ang Police Regional Office (PRO) 7 gidungan na og pwersa sa mga pulis gikan sa kaulohan ug silingang rehiyon.

Samtang, niadto lang Hulyo 1, Miyerkules, ang probinsiya sa Negros Oriental gipaubos na sa modified general community quarantine (MGCQ), kon mao na paghinayhinay sa pagbangon sa mga Negrensee ngadto na sa pag-abli sa mga establisemento.

Matod ni PCol. Arnel Banzon, provincial director sa Negros Oriental Police Provincial Office (NOPPO), nga ang pagpatuman sa kapulisan sa seguridad sa probinsya wala mausab.

Ang pagpahigayon sa checkpoint sa matag lungsod magpabilin lang gihapon sa naandan bisan paman nga kaniadto ang probinsiya gipaubos sa enhanced community quarantine (ECQ).

Dugang ni Banzon nga dili wad-on sa ilang pag-monitor sa katawhan nga ipatuman ang social distancing aron makasiguro nga dili maka-penetrate ang kagaw sa mga lungsod.

“No wala tay nausab padayon lang man gihapon ta, gawas lang sa mga establishment nga naghinay-hinay na og balik,” dugang niini.

Samtang ang probinsya sa Negros pabiling nagpatuman lang gihapon sa no backride policy bisan paman nga MGCQ na.

“Wala paman tay guidelines ana sa amoa so, mao lang gihapon ang implementasyon nga dakpon sa pulis ang mosupak sa balaod ilabi na sa pag-angkas nga gidili pa gihapon,” dason niya.

Dugang ni Banzon nga dunay mga lungsod nga dunay mga nadakpan sa paglapas sa MGCQ apan sukwahi kaniadto nga maihap nalang.

“Naa tay mga dinakpan apan lahi gyud sa una, karon maihap nalang diria man gud ang mga tawo conscious kaayo sa ilang kaugalingon nga sila mismo nag bantay usab,” dugang niya.

Ang NOPPO moabag sa Philippine Coast Guard sa pagbantay sa coastal area barangays aron walay makasulod sa probinsya nga mga tawo gikan sa laing probinsya nga wala moagi sa insakto nga proseso.

Sanglit nga ang Departmemt of Interior and Local Government (DILG) duna may gipagawas nga memorandum order ngadto na sa dili una pagdawat og mga tawo gikan sa sulod ug gawas sa Sugbo.

Ang PNP kanunay naka-monitor ug misubay sa protocol nga gipatuman karon sa Inter-Agency Task Force (IATF) on Covid-19. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph