TEMPORARYO nga wala manawat una og mga transaksyon sama sa pagkuha og barangay clearance ang Barangay Guadalupe human nga mamatay ang usa ka konsehal sa barangay.
Si Guadalupe Barangay Captain Michael Gacasan niingon nga iya unang gipa-lockdown ang barangay hall human nipahibalo ang Cebu City Health Department.
Samtang, ang ubang gimbuhaton sa barangay anha lang una nila himuon sa gawas sa barangay hall.
Sa pagkakaron, walo ka mga staff sa barangay ang gipaubos una sa quarantine ug anaa na sa isolation center facility sa barangay.
Dugang ni Gacasan nga ang walo ka mga staff nga gipaubos na sa quarantine maoy dunay direct contact ngadto na kang anhing Konsehal Ruben Baculi, kinsa namatay sa milabay nga semana.
Si Baculi namatay ug base sa resulta sa test, positibo kini sa coronavirus disease 2019 (Covid-19).
Siya usab ang gitudlo nga tsirman sa Barangay Health Emergency Response Team (BHERT).
"Halos staff namo nga maoy mohimo sa barangay maoy dunay direct contact man gud kang Konsehal Baculi mao to nga ako lang sa gipa-lockdown ang barangay hall," matod ni Gacasan.
Si Baculi namatay niadtong Lunes, Hunyo 29, ug gilubong dayon sa pagka Martes, Hunyo 30.
Samtang nagsugod na sila sa pag-isolate sa mga staff nga dunay direct contact kang Baculi.
Ang maong konsehal gidala sa usa ka pribado nga tambalanan apan pila lang ka oras ang milabay, namatay kini.
Si Baculi high blood ug taas usab ang iyang sugar.
"Amo na gi-disinfect ang barangay niadtong milabay nga semana," sumala sa barangay kapitan.
Gipaniguro ni Gacasan nga ma-disinfect dayon ang barangay aron masiguro nga luwas ang uban nga mga staff nga maoy naglihok sa barangay.
Plano ni Gacasan nga karong Miyerkules balik na sila sa operasyon apan obserbahan pa niini ang walo ka mga staff kon dili madala mamahimong sa mosunod pa nga semana sila mobalik sa operasyon sa barangay subay usab sa pagtugot sa city health.
"Akong gi-monitor ang walo nako ka staff wala man hinuon sila gipamati apan gisiguro lang gyud sa pag-isolate," dugang niya.
Sa kasamtangan ang frontliners lang una sa barangay ang naka-duty sa kasamtangan nga maoy molihok niining krisis sa Covid-19.
Dugang nasayran nga ang pag-lockdown sa barangay hall gisugdan niadtong Miyerkules, Hulyo 1. (BBT)