SUPERBALITA CEBU

Nadela: Sentido Komon

Asoy Ni

GISUGO ka pagpalit og usa ka kilong asukar. Pag-abot nimo sa tindahan giingnan ka sa tindera nga pulos gisulod og plastic nga tag tunga sa kilo ang ilang baligya. Ang duha ka plastic motimbang og usa ka kilo. Kay usa ka kilo man ang gisugo nagpalit ka og duha ka plastic.

Sama ra nga nisakay ka og taxi padulong sa dalan Colon. Giingnan ka sa driver nga sirado ang tibuok Colon kay dunay kalihukan. Ang biyahe kutob ra sa palibot sa Cebu City Hall. Sa imong hunahuna way problema kay mahimo rang lakwon padulong sa maong dalan gikan sa imong kanaugan.

Sa duha ka mga gipanghisgutan, di pweding mopauli nga wa kay dala nga asukar tungod lang kay way baligya nga usa gyud ka kilo. Di sab mahimong di nalang ka mosakay sa taxi tungod lang kay di kino makalahos sa imong tuyo.

Mao ni gitawag nga sentido komon. Nga sa iningles pa common sense. Kong ato ni nga i-apply sa mga panghitabo karon taliwala sa dakong krisis sa panglawas nga atong gisagubang nga dinala sa di makita nga coronavirus, di ba tinuod nga dunay daghang salawayong buhat nga makaingon ka wala gyud gamita ang sentido komon.

Kana lang pagdili sa pagsigi og gawas gawas sa balay bisan kon way klarong tuyo. Asa may sentido komon diha kon igo lang kang morason nga gilaay ka sa inyo mao nga nagpasopaso ka sa gawas. Samot na kon ang imong paggawasgawas nabutang sa peligro ang imong panglawas apil na ang imong pamilya kay niapil sa duot sa mga tawo nga nagpabadlong sama sa piyesta, disco ug uban pa.

Akong Lola Manol kaniadto sa mga gagmay pa mi sa akong manghod nga si Mercy, kanunay'ng namong madunggan nga magsiya-ok ang baba ug ang pulong nga sentido komon sagad among madunggan. Sipyat sa sugo, ingnon dayon ka nga gamita ang imong sentido komon.

Bitaw, mao ra man gyud ni angayan nga tamdan. Di ka gustong madakpan ug mangadye sa Plaza Independencia, gamita ang imong sentido komon. Di ka gustong mataptan sa virus gamita ang imong sentido komon.

Unya sa nakalabay nga mga adlaw ug hangtod karon sakit kaayo sa dunggan paminawon kining mga reklamo batok sa quarantine pass. Asa man ang sentido komon sa gipatuman nga paagi nga maghuwamhuwam og quarantine pass ang uban aron makapamalit og pagkaon apil na ang tambal.

Ang nagdala sa quarantine pass nga taga door number 2 sa usa ka dakong apartment, naglinya pa sa merkado sa Pardo, kanus-a man si door number 10 makagamit aron makadagan sa botika kay may gisakitan og tiyan sa ilang pamilya.

Unya dinalian man. Maayo unta og makahibalo tang daan kon kanus-a ta sakitan sa tiyan. Unya, tinghatag na man sa ayuda sigon sa pahibalo sa taga Department of Social Welfare and Development kun DSWD, asa man ang sentido komon pag-andam sa lista nga angay hatagan wala man makarga.

Gamiton lagi nato ang atong common sense aron di makalapas sa mga health protocol nga gilatid sa gibyerno. Pero kon ang taga gobyerno ang di mogamit sa ilang sentido komon pagtunol og tinud-anay nga serbisyo okey ra. Paita.

Nangamuyo ako ug akong pamilya nga tabangan kami sa pag-ampo sa Labawng Makagagahum nga unta lamdagan sa Espiritu Santo ang makinaadmanon nga panghunahuna sa mga sakop ubos balay balaoranan nga ilang suportahan ang panawagan paghatag og bag-ong prangkisa sa ABS-CBN.

Ako isip kanhi sakop sa Kapamilya Network naluoy ug nakasabot sa kahimtang sa akong mga kauban sa trabaho kaniadto.

Di sayon nga makulban sa kaldero ilabi na ning panahon sa pandemya.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph