POLICE station sa lungsod sa Carmen, Lalawigan sa Bohol gi-lockdown sa Police Regional Office (PRO)-Central Visayas human namatay ang hepe niini nga gidudahan nga nataptan sa coronavirus disease (Covid-19).
Tanang mga pulis sa lungsod ang gipang-isolate na usab, lakip na ang pamilya sa police official.
Niadtong Sabado, Hulyo 4, si Police Major Jodel Torregosa gidali pagdala sa tambalanan tungod sa paglisod sa pagginhawa, apan namatay samtang nagpadung pa.
Gipakuhaan na hinuon og swab sample si Torregosa alang sa Covid test, apan wa pay resulta.
Matod ni Police Brigadier General Albert Ignatius Ferro, hepe sa kapulisan sa Central Visayas, nga gipang-isolate na usab ang 20 ka mga personnel sa police station .
“We are in lockdown sa tibuok nga police station because of suspected Covid individual in the person of the chief of police. But we have no confirmation yet of the result of the swab but there’s a precaution, among gi-lockdown tapos among gipa swab tanan including the family of the late officer,” matod ni Ferro.
Milusad na ang kapulisan sa lalawigan sa Bohol og contact tracing.
Duna na usay gipadala nga mga pulis ang Bohol Police Provincial Office (BPPO) sa lungsod aron kasamtangang mohulip sa mga pulis nga gi-isolate.
Sa talaan sa PRO-Central Visayas, niabot na sa lima ka mga pulis ang nakalas sa Covid-19 sa tibuok Rehiyon 7, diin 223 ang nataptan sa maong sakit samtang 73 na ang naka-recover.
Apan gipahibawo sa heneral nga adunay maayong balita tungod kay hingpit nang nangaayo ang 18 ka mga pulis nga nagpositibo sa Covid dul-an usa ka buwan na ang nakalabay.
Sa mosunod nga mga adlaw, matod niya nga adunay laing dul-an sa 30 pa ang kandidato na usab nga makagawas sa recovery facility kon mogawas nang negatibo ang ikaduhang swab test.
“Kanang atong mga police man gud nga natakdan asymptomatic and most of them are really doing good. We are just waiting for the swab result of around another 26 personnel. Maybe in the next few days another testing of around 20 and so on para ato silang ma check,” pagklaro ni Ferro. (AYB)