PAGTAAS sa kaso sa coronavirus disease (Covid-19) ug ang batasan sa mga residente ug paunsa kini gidala sa mga barangay officials maoy nahimong basehan kung nganong gipailawom sa "hard lockdown" ang Barangay 23-C, Isla Verde sa Poblacion District, Davao City.
Kini ang gibutyag ni Davao City Mayor Sara Duterte-Carpio atol sa regular nga radio interview niini sa dcDR 87.5 FM kagahapon.
"Daghan ni og basehan, mainly ang cases, batasan sa mga tawo and kakayahan sa barangay officials. All those factors nag-contribute sa decision na ibutang siya under hard lockdown," ingon ni Duterte-Carpio.
Dugang niya nga sa ilang meeting, mismong si Barangay 23-C Kapitan Alimoden "Wating" Usman miangkon nga gahi gyod og ulo ang pipila ka mga residente.
"Giistorya na nato ang barangay captain ani kung what is wrong? Miangkon gyod ang barangay kapitan nga maglisod sila," ingon ni Duterte-Carpio, kinsa nagsumpay nga kung dunay mga opisyal sa barangay nga makit-an sa mga tawo, diha pa magsuot og face mask ang mga residente nga anaa naglaroy sa ilang mga tugkaran.
Sa gihimong hard lockdown gipasabot ni Duterte-Carpio nga di gyod kagawas ang mga residente gawas nalang kung dunay emergency nga dalhon sa ospital.
"Meaning dili na sila makagawas ug makasulod. The only individuals na makagawas dira kadtong moadto sa doctor ug hospital," ingon sa mayor.
Nagpahinumdom gyod ang mayor sa Dabawenyo nga kung dunay bag-ong abot nga mga tawo labi na og gikan sa Barangay 23-C, kinahanglan nga mohimo kini og 14-day quarantine.
Giingon kini sa mayor human nasayran nga dunay mga taga Barangay 23-C nga nanggawas ug namuyo sa ilang mga paryente ug kaila usa ka adlaw una
ipailawom sa hard lockdown ang barangay.
Ning kasamtangan, walay natala nga masinupakon sa hard lockdown sa maong barangay sanglit matag purok dunay mga sundalo ug pulis.
Duna say mga tawo nga natahasan sa lokal nga kagamhanan ning siyudad sa paghatud og mga pagkaon sa mga kabalayan ning maong barangay. (Jeepy P. Compio)