HIMUONG isolation center sa Dakbayan sa Mandaue ang Norkis Park sa Plaridel St., Looc, Mandaue City ug Cebu North Bus Terminal sa Barangay Subangdaku.
Kini human nakadawat og memorandum ang Dakbayan gikan sa Department of Education (DepEd) nga kutob na lang sa July 30, 2020 ang paggamit sa mga eskwelahan isip isolation centers.
Ang tanang pampublikong eskwelahan sa dakbayan sa Mandaue gihimong isolation centers.
Ang Mandaue City Central School, labing dakong isolation center sa dakbayan alang sa mga nagpositibo sa coronavirus disease (Covid-19) nga adunay mild hangtod sa moderate nga kondisyon ingon man sa walay simtomas.
Giinspeksyon sa Lunes, Hulyo 6, 2020, ang duha ka mga luna nila ni Mandaue City Mayor Jonas Cortes, retired Major General Melquiades Feliciano, co-implementer sa national Covid-19 task force ug Dr. Sophia M. Mancao, division chief sa Department of Health (DOH)-Central Visayas Licensing, Regulation, and Enforcement Division.
Sigon ni Cortes nga ang duha ka luna maoy ilang Plan B human sila mohawa na sa mga pampublikong eskwelahan aron magamit na sa DepEd.
Ang DepEd nag-target sa Agusto 24 nga pagsugod sa klase. Wa pay kausaban ning mao nga plano bisan sa pagdaghan og balik sa mga kaso sa Covid-19.
Nagkasultianay na sila si Cortes ug negusyante Norberto Quisumbing Jr., tag-iya sa luna sa Norkis Park ug mitugot kini nga gamiton sa dakbayan ang Norkis Park nga butangan sa isolation center.
Sa ikaduhang luna, Cebu North Bus Terminal, gipahibawo na ni Cortes ang iyang interes nga kuhaon na balik ang luna sa CNBT.
Gani nagpadala na si Cortes og suwat ngadto ni Cebu City Mayor Eduardo Labella nga gamiton na kini sa dakbayan.
Ang kontrata sa luna sa CNBT kutob na lang sa Oktubre karong tuiga.
Nanghinaot si Cortes nga mosugot si Labella nga gamiton na sa dakbayan sa Mandaue ang luna bisan aduna pay tulo ka buwan nga nahabilin sa kontrata. (KFD)