MOABOT na sa 20 ka mga kawani sa Cebu Provincial Capitol nga positibo sa coronavirus disease (Covid-19).
Kini human nga nadugang sa listahan ang duha ka mga kawani sa Kapitolyo nga puro mga lumolupyo sa Dakbayan sa Sugbo.
Kini maoy gibutyag ni Dr. Christina Gianggo, pangu sa Provincial Health Office (PHO) sa Hulyo 6, 2020.
"Oo 20 na ka buok. Hapit na man sad ni sila maka recover...taga Cebu City sila," matod ni Gianggo.
Dugang ni Gianggo nga nakasinati usab og simtomas sa sakit ang mga empleyado.
Wala na mohatag pa og dugang detalye si Gianggo labot sa bag-ong mga kaso. Gipahigayon ang disinfection sa mga opisina sa Kapitolyo sugod sa Hulyo 1 hangtod sa Hulyo 3 hinungdan nga gisuspenso una ang pagtunga sa mga empleyado.
Hinuon gikatakda ang pag balik na sa trabaho sa mga empleyado human sa pag disinfect.
Padayon gihapon nga wa gipatrabaho ang mga empleyado nga may underlying health conditions, immunocompromised ug kadtong mga nag edad og 60 pataas aron malikay sa sakit. (ANV)