KAPIN sa P5 milyunes sa shabu ang nasakmit sa managlahing operasyon sa mga sakop sa Philippine Drug Enforcement Agency (PDEA-7) ug City Intelligence Branch (CIB) Cebu Drug Enforcement Units (CDU) sa Cebu City Police Office (CCPO) sa Barangay Labangon ug Calamba, dakbayan sa Sugbo niadtong Sabado.
Labangon
Sa buy-bust operation sa Labangon niadtong Sabado sa alas 7:20 sa gabii, P4.3 milyunes nga balor sa shabu ang nasakmit, base sa Dangerous Drugs Board (DDB) value.
Ang subject sa operation nga high value target sa PDEA 7 nga si Junmar "Avatar" Umpad, 30, nakasibat apan napusasan ang iyang sinaligan nga si Mark Gonzales, 22, nagpailang drayber og traysikad sa dapit.
Si Gonzales nakuhaan og 100 gramos nga shabu nga mobalor sa P360 mil ug laing usa ka kilong shabu nga giputos sa adult diaper nga gisulod sa plastik.
Si Yogi Filemon Ruiz, director sa PDEA-7, nibutyag nga niadto pang Enero ning tuiga ilahang gisubay si Umpad alyas "Avatar" apan idlas kini.
Base sa ilang transaksiyon, ang mga ahente sa PDEA 7 nagtuo nga si Umapad maoy mohatud sa drugas apan gipadala sa sinaligan nga si Gonzales.
Matod ni Ruiz nga si Umpad maka-diposed og 2 ka kilo nga shabu matag semana sagad sa Barangay Pasil ug Labangon, diin ka kunsabo niya si Gonzales, isip tigdala.
Si Umpad giingong usa sa 19 nga mga sakop sa drug syndicate dinhi sa Sugbo, nga idlas kaayo, sumala sa PDEA 7.
Si Ruiz niingon nga nagtakoban lang ni Gonzales, ang pangangkon nga usa siya ka drayber sa traysikad apan ang tinuod niini ka kunsabo siya sa pagpamaligyag sa drugas.
Gipadayag niini nga estilo sa grupo nga ang mga kinilong shabu isagol nila sa pagputos sa adults diaper aron dili sila mahibaw-an.
Si Gonzales, nga nahinabi sa Superbalita Cebu, miangkon nga siyay nag-deliver sa shabu, tungod sa ka wad-on misugot siya bugti sa suhol nga P1,000.
Kini maoy ikaduha niyang pag-deliver og shabu diin gikuha niya gikan sa usa ka wa mailhing tawo nga nagsakay sa motorsiklo nga maoy gihatag nga instruction ni Umpad, una niya ihatod sa ilang kustomer.
"Panggatas sir! kay kulang gyud ako income isip driver sa trisikad, maluoy ko sa akong kapuyo ug anak. Unya magtigom sab ko aron makakuhag lisensiya maka-drive napud unta ko," dugang ni Gonzales.
Calamba
Dul-an sa P1 ka milyon nga balor sa drugas ang naksamit sa CIB-CDU sa CCPO sa duha ka operasyon sa Barangay Calamba.
Gipusasan sila si Gemrob Flores Bulambao, alias Biboy", 25, ug iyang inahan nga si Gema, 51, dihang nadakpan sa buy-bust operation sa may Quijano Compound, Calamba, mga alas 6:20 sa gabii niadtong Sabado.
Nakuhaan silag P200 buy-bust nga usa ka pakite, si Gemrob, nakuhaag 30 ka gramos nga shabu, samtang nakuha sa possession sa iyang Mama nga si Gema, 5 ka gagmayng putos, 4 ka dagkong bulto motimbang sa 22 gramos.
Ang drugas gibanabana nga mobalor kini P613,600 sa DDB-value.
Subay niini gipusasan sab sila si Judith Verdezola, kinsa nadakpan pinasikad sa warrant of arrest mga alas 11:30 sa gabii sa Sitio Mahayahay Calamba.
Dihang gi-serve ang warrant of arrest may kalambigitan sa drugas nakuhaan siyag 2 ka medium sizes nga putos motimbang og 10 gramos mobalor og P118 mil.
Ang mga dinakpan pasakaan og tukmang kaso karong adlawa.