GISUGDAN na sa Department of Social Welfare and Development (DSWD) 7 ang pagpanghatag sa Social Amelioration Program (SAP) fund sa mga pamilya nga wa mahatagi sa ayuda sa gobyerno, apan qualified nga makadawat.
Mao kini ang gitawag nga waitlisted sa SAP diin gisugdan sa ahensiya pagpanghatag niadtong Biyernes, Hulyo 3.
Upat ka local government units (LGUs) ang unang nahatagan sa SAP waitlisted nga beneficiaries.
Matod ni DSWD 7 Regional Director Rebecca Geamala nga niadtong Biyernes ug Sabado, ilang gitunolan ang 1,277 ka mga pamilya sa Lalawigan sa Sugbo sa P6,000 nga ayuda matag pamilya.
Lakip sa LGU nga nakadawat na sa waitlisted sa SAP ang Consolacion, Compostela, Oslob ug Liloan.
Aduna’y 149,579 ka waitlisted beneficiaries ang tibuok Central Visayas.
Subay niining pagsugod na sa pagpanghatag sa SAP, mosunod na usab ang second tranche alang sa SAP beneficiaries.
Ang waitlisted family-beneficiaries mao ang mga “eligible low-income families who were not included and provided with emergency subsidy aid by DSWD and other government agency for the first tranche.”
Aduna’y 585,376 nga low-income households sa Sugbo ug sa highly urbanized cities ang unang kwalipikado sa second tranche sa SAP diin mosumatotal kini og P3.5 bilyones. (HBL)