DRUGAS ang giingong gidemanda sa gikatahapang mga kidnapper sa usa ka lalake, apan naproblema karon ang kapulisan human nila mapatay ang usa sa mga suspek sa Dominggo sa alas 11:15 sa gabii, Hulyo 5, 2020 sa sityo Bantayan, Barangay Tungkop, lungsod sa Minglanilla.
Ang biktimang 21 anyos giingong gikidnap sa wa pa mahibaw-ing gidaghanon sa armadong mga lalake nga sakay og duha ka mga sakyanan niadto pang Hunyo 2, 2020 sa parking lot sa usa ka unibersidad sa Dakbayan sa Sugbo.
Giingong nidemanda ang mga kidnapper og tunga sa kilo nga shabu bugti sa ilang pagpalingkawas sa biktima.
Ngan sa biktima ug ubang mga detalye gipugngan ning mantalaan subay sa hangyo sa kapulisan kay nagpadayon pa ang operasyon.
Nasubay na unta nila ang usa sa mga suspek nga giilang si Joavani “Vani” Bogo, hingkod, apan giingong nakigpinusilay kini nila hinungdan nga napatay.
Ang joint operation gipahigayon sa Anti-Kidnapping Group Visayas Field Unit (AKG 7-VFU) ug Minglanilla Police Station.
Ang joint team gipangulohan ni Police Executive Master Sergeant Zosimo Ravanes sa AKG.
Si Bogo nakuhaag usa ka .38 kalibreng revolver nga dunay mga bala.
Si Police Staff Sergeant Ernest Laspuña, sa Minglanilla Police Station nga nahinabi sa Superbalita Cebu, niingon nga ilang gipanid-an si Bogo.
Si Bogo maoy primary suspect sa pagdagit sa lalake base sa closed circuit television (CCTV) camera footage.
Si Bogo giingong namusil kanila dihang nakakita hinungdan nga nahitabo ang pinusilay.
Si Bogo naigo sa nagkadaiyang bahin sa iyang lawas namatay diha-diha.
Matod ni Laspuña nga si Bogo ilang high value target (HVT) sa illegal drugs, nalambigit sa gun running sa Lalawigan sa Sugbo ug kidnapping.
Matod sa usa ka tinubdan nga dako ang posibilidad nga illegal drugs ang motibo sa pagdagit kay ang mga kidnaper giingong nidemanda og tunga sa kilo nga shabu.
Nipasabot ang tinubdan nga posibleng dunay “gitambling” ang biktima.
UNSAY NAHITABO?
Nakig-alayon ang Police Regional Office sa AKG 7-VFU labot sa kaso.
Matod ni Police Brigadier General Albert Ignatius Ferro,hepe sa PRO 7, nga sa inisyal nga impormasyon, nilusad og surveillance ang mga sakop sa AKG human usa ka ginang nidangop sa ilang buhatan aron i-report ang miyembro sa pamilya niini nga na missing sukad niadtong Hunyo 2.
Apan sa dihang padung na nga mosulod ang mga pulis sa balay,namusil si Bogo.
“Actually I was informed by the anti kidnapping group here in Central Visayas that the family of a missing person appeared to their office asking for help. So, they were investigating and yesterday when they were conducting surveillance and check, they were fired upon. So, naay armed encounter didto sa Minglanilla and that resulted to the death of that particular person who happens to be a drug personality,” matod ni Ferro.
Dugang ni Ferro nga nakig-alayon sila sa pamilya sa biktima.
Sa imbestigasyon sa AKG,adunay kalamigitan sa illegal nga drugas ang kaso. Posibleng nakasala ang biktima o gidudahan nga police informer.
“Actually, we should exert more effort to locate and find the particular person ang gi kidnap. Because the analysis here is this a drug incident that led to abduction, kidnapping. And then, ang ana man gud, pag di ka nakabayad or di ka nag remit or somebody that they suspect this a police informant, that the drug syndicate will surely abduct you,” dugang ni Ferro.
Niabag na karon ang Regional Intelligence Division (RID) sa imbestigasyon.