MAGPADAYON ang 2019 Southeast Asian (SEA) Games gold medalist nga si Margielyn Arda Didal sa iyang training sa Lapu-Lapu City Skatepark aron pangandaman ang iyang tinguha nga makasulod sa 2021 Tokyo Olympics.
Matod ni Philippine Sports Commission (PSC) officer-in-charge Ramon Fernandez nga nakahan-ay na ang eskedyul ni Didal human sila nakig-coordinate sa Philippine National Police (PNP) ug Lapu-Lapu City government.
Si Didal usa sa garbo nga atleta sa Sugbo human kini milangkat og kadaugan sa managlahi nga kompetisyon sa gawas sa nasod sama sa 2018 Asian Games, 2019 SEA Games ug sa 2019 Annual Exposure Skate.
Gipadayag ni Fernandez nga aduna na sila'y arrangement ni PNP Region 7 Director General Albert Ferro ug Lapu-Lapu City legal officer James Allan Sayson alang sa national athlete nga si Didal.
“She will be there every Monday, Wednesday and Friday from 3 to 8 p.m. We have already arranged it with Philippine National Police Director General Ferro,” matod ni Fernandez.
Si Didal, kinsa lumad nga taga Lahug, Cebu City, gihulagway nga usa sa Pinoyng mga atleta nga adunay dakong poruhan nga makasulod sa Olympics, ang labing dako nga multi- sporting events sa kalibutan.
Hayag na unta ang Olympic slot para kang Didal apan nahunong ang mga duwa tungod sa pandemya nga miigo sa tibuok kalibutan nunot ning pagkuyanap sa coronavirus disease 2019 (Covid-19).
“Kini nga alternative gibuhat para naa sa kondisyon pirme atong atleta,” dugang ni Fernandez.
Ang Cebu City kasamtangang anaa pa sa enhanced community quarantine (ECQ), ang labing estrikto nga quarantine measure sa tibuok Pilipinas.
Samtang ang Lapu-Lapu City gipaubos na sa General Community Quarantine (GCQ) ug gitugotan ang individual sport sama sa skateboarding basta tumanon lang ang quarantine measures sama sa social distancing ug pagsul-ob og face mask.
“We will have Margie (Didal) escorted to Lapu-Lapu City so she can cross borders. That’s the alternative for now,” dugang ni Fernandez.
Si Didal nagsugod sa skateboarding dinhi sa Sugbo ug ang skatepark sa Lapu-Lapu City usa sa mga lugar nga iyang giduwaan sa wala pa siya mosikat pinaagi sa Street League Skateboarding Pro Open ug 2018 Asian Games.
Kasamtangang anaa si Didal sa No. 14 ranking sa female street skater sa world ranking.
Niadtong niaging buwan, si Didal mipakita sa iyang katakos sa online skateboarding nga kompetisyon nga mao ang Asian Skateboarding Championships 2020 Lockdown 5 Video Competition.
Siya midaog sa women’s division human makatali og 8.5 nga puntos ug gilupig niya ang iyang Japanese rival Yurin Fujji, kinsa mikulit og 7.5 puntos.
Ang PSC misaad nga usa sa ilang prayoridad karon ang paggiya sa mga atleta nga nanghinaot makalangkat og luna sa 2021 Tokyo Olympics.
Aduna nay upat ka mga atleta ang Pilipinas nga naka-qualify sa matag upat ka mga tuig nga kompetisyon.
Kini mao sila si Eumir Marcial ug Irish Magno sa boxing, EJ Obiena sa pole vault ug Carlos Yulo sa gymnastics.