HUGTANONG gipanghimakak sa manager ni Deontay Wilder nga si Shelly Finkel ang hugonhugon nga dili makig-away ang iyang batok kang Tyson Fury sa ikatulong higayon.
Dili pa lang dugay, adunay taho nga mas gipili ni Wilder nga kontrahon si Dillan Whyte karong tuiga nga nakapangagha ni Finkel.
“I don’t know where a story about Deontay Wilder pulling out of the Tyson Fury fight comes from. It’s simply not true," matod ni Finkel sa interbyu sa World Boxing News.
“Deontay Wilder intends to fight Tyson Fury. That is the next fight and it will happen.”
Dili kini maoy labing unang higayon nga adunay migawas nga hugonhugon nga dili madayon ang gikaintapang heavyweight trilogy sukad nga nakadesisyon si Wilder nga dili una magpa-interbyu sa media.
Sa sayo pa, adunay migawas nga taho nga ang ikaharong ni Fury ning tuiga mao si Anthony Joshua.
Kining maong taho gipanghimakak nila ni Finkel ug Top Rank boss Bob Arum, kinsa maoy promoter ni Fury.
“I’m not sure there is really anything needed to be added to this situation,” dugang ni Finkel.
“We have covered this and there is nothing more to add, other than we are looking forward to fighting Fury. That’s all.”
Gikataho sa WBN nga naka-reserve na ang Disyembre 19, 2020 nga petsa alang sa Wilder-Fury trilogy sa bag-ong natukod nga Allegiant Stadium sa Las Vegas, USA.
Hinuon nagdepende kining tanan sa sitwasyon taliwala ning padayong hulga sa coronavirus disease 2019 (Covid-19). (ESL)