SILA mismo si Secretary Roy Cimatu ang nagkanayon nga dunay problema ang unang pag-apod-apod sa mga quarantine pass mao nga ilang gipailisdan og lain. Apan giilisdan og quarantine pass nga ipasapasa sa mga silingan. Mahibong pa ta nga mosaka ang mga positibo sa Covid-19?
Ingon niini ang simple nakong pag-analisa. Hinuon, maghulat ko sa mga datos nga makuha sa grupo nilang Sec. Cimatu aron makaingon nga sakto ba o sayop. Di ba gibalita sab nga ilang tarungon ang reporting system nga makalibog?
Ang ako lang, nganong mag-apod-apod man og bag-ong quarantine pass nga dili per household.?Nganong kining maong pass kinahanglan man hinuon ipasapasa sa mga silingan kay giingong kulang.
Gipangutana bitaw si Mayor Edgar Labella niini sa usa ka press conference. Matod pa niya, ang gidaghanon sa household nga ingong 178,000 gikan sa DOH. Ug ang maong numero di gyud sakto kay 2016 pa diay.
Hah? Nakahibawo siya nga kulang apan nagkanayon ang mayor nga ang barangay ang mopahapsay niini.
Naa lang koy problema sa maong pamahayag. Dili ang DOH ang naghimog census. Ug ang katapusang census 2015. Bisan ang palusot sa mayor sayop.
Karon, daghan na ang mga reklamo kabahin sa sharing sa usa ka quarantine pass sa pipila ka household. Kon dunay usa nga positibo nga nakagunit sa maong quarantine pass, dili lang usa ka household ang mapeligrong matakdan.
Mao nga dili kahibudngan kon mosaka gyud ang numero sa mga positibo sa Covid-19 sa Syudad sa Sugbo.
Ikapila na kita makakita ni Mayor Labella nga mura lang gihapon og hapsay ang dagan sa Syudad sa Sugbo. Lalim bay kadtong halos tanan na-alarma sa pagsaka sa miading buwan, nanghangyo pa siya sa kaulohan nga moabli na ang atong ekonomiya.
Nisuway pa kini sa paghangyo nga dili kita ibalik sa ECQ ug ipadayon ang GCQ kay kuno ang pagsaka sa mga kaso nga positibo mao ang mass testing ug ubos ang namatay dinhi.
Inamaw nga rason kay ang mass testing dili man makatakod. Paagi kini aron makahibawo kita unsa na ang kahimtang. Kon daghan ang positibo, mahibaw-an nato nga daghan na diay. Kon gamay ra, gamay ra gyud ang moguwa nga numero.
Kay nagkadaghan man ang positibo, nakuyawan ko nga mosaka gyud ang kadaghanon sa mamatay labi na kon moabot ang punto nga dili na ma-accommodate sa mga hospital.
Nakahibawo na man kita nga dugay maayo ang mga Covid-19 cases. Busa, di sila ma-discharge dayon sa hospital samtang dunay mga bag-ong kaso nga kinahanglang ipa-admit.
Aron maluagluag ang kahimtang sa hospital, kinahanglang magamit ang tanang mga quarantine center sa Syudad sa Sugbo. Nahadlok ko nga inig saka pa gyud sa kadaghanon sa mga positibo, mag-waitlist na sab nga napuno na ang mga hospital ug quarantine center. @anol_cebu sa Twitter