GUMIKAN sa nagpadayon nga pagpakiggubat sa coronavirus disease (Covid-19), daghan na ang gihimong mga pamaagi aron dili mokuyanap ang virus hangtud nga aduna nay vaccine nga madiskobre. Samtang nagpaabot kita sa tambal ning maong matang sa balatian, ang basic protocol ra gyud ang atong bugtong panagang. Unsa man ni? Aw, mao ang pagsul-ob og mask, handwashing ug social distancing.
Mosagop na kita sa new normal. Lagyo o distansiya gyud sa usag-usa. Mao nga ang pampublikong mga sakyanan karon usbon ang design sa lingkuranan. Kanang dili magtupad. Mao usab sa eroplano ug barko. Dili pun-on ang kapasidad o 50 percent lang ang tugutang pasakyon aron adunay lat-ang matag lingkuranan.
Ginadili na ang panagtapoktapok. Sa mga restaurant, bar o kan-anan, aduna gyuy distansiya. Dili na magduol. Bisan man gani sa simbahan dili na pasudlan og daghan kaayong manimbahay. Ang mga engrandeng kasal, dili na tugutan, gamay na lang ang sponsors o mga abay. Mao usab sa bunyag ug lubong. Daghang mga kasal ang na-postpone niadtong miaging mga buwan kay gipaubos man kita sa enhanced community quarantine (ECQ).
Gumikan kay gidili naman ang mga engrandeng kasal nga daghan kaayong sponsors o motambong, si Kabayan Partylist Kong. Ron Salo misang-at og balaudnon nga puwedeng himuon ang virtual wedding. Virtual o online sama anang gihimo karon nga session sa Kongreso ug City Council, meetings ug press conferences. Sa House Bill No. 7042, nga Virtual Wedding, puwede na himuon kini sa bisan asang simbahan. Basta kompleto lang ang mga papeles sa magpakasal. Miuyon na usab ang kadagkuan sa simbahan niini.
Kon mahimong balaod, ang lalake puwedeng adto sa laing lugar ug ang babaye anhi dinhi sa Sugbo. Unya magtagsa lang sila og gadget apil na ang pari. So, mo-perform ang pari sa seremonyas pinaagi sa zoom o on line. Kuyaw og inig pangutana sa pari ngadto sa lalaki: "Imong bang dawaton kini si babaye isip imong asawa’. Unya moingon ang lalaki." "Father, dili ko makadungog kay putol-putol imong signal kay hinay ang internet diri". Unya ang reception ug honeymoon, virtual pod? Ka way ayo, dili na ta makadama anang kalakiha.