TUNGOD sa naghingapin niyang selos sa iyang silingan nga iyang gituohang nihawok sa iyang kapuyo, mag-uuma namatay sa ilang tinigbasay tali sa iyang higalang mag-uuma sa Purok Ahito, Sityo Center Star, Barangay Taloot, lungsod sa Barili sa Martes sa alas 6 sa buntag, Hulyo 7, 2020.
Namatay sa mga samad tinigbasan si Alejandro Umpad, 55, samtang way tatsa ang suspek nga giilang si Feliciano Pabroa, 60, minyo, mag-uuma.
Si Police Corporal Michael Villardar, sa Barili Police Station nga nahinabi sa Superbalita Cebu, nagkanayon nga si Pabroa nagsakay sa iyang kabaw padulong mopauli gikan nagdaro sa iyang umahan.
Si Umpad nga gikatahong nagbitbit og sundang nag-atang kaniya sa agianan, nanghagit kaniya og tinigbasay.
Si Pabroa nga nakakita kang Umpad nga paspas nga naglakaw padung kaniya daling niambak gikan sa buko-buko sa iyang kabaw ug nilanit sa iyang sundang.
Susamag salida sa sine ang sunod nahitabo dihang nagtinigbasay ang managsilingan.
Wa makaigo bisan makausa si Umpad kang Pabroa samtang ang nahauna naigo sa makadaghan sa nagkadaiyang bahin sa iyang lawas hinungdan sa iyang pagkamatay.
SINUGDANAN
Matod pa ni Villardar nga sila si Umpad ug Pabroa taudtaud na nga nagkabangi.
Si Umpad giingong nasuko kang Pabroa kay gisuginlan siya sa iyang mga anak kabahin sa kapuyo niini nga giingong gihikap ang lawas ug gihagkan.
Tungod niini, nagkalubog ang ilang panaghigalaay ug kanunay na nga maglalis.
Si Pabroa nanghimakak sa pasangil nga duna silay relasyon sa kapuyo ni Umpad.
"Kuan, Sir, iyaha daw na gisung-ay ang bata (anak sa kapuyo ni Umpad) unya gitunol niya sa kapuyo sa biktima. Siyempre, nasaghid ang kamot sa lawas nya niduko, murag nakahawok,” nagkanayon si Villardar.
Matod niya nga gilain lang kini og sabot sa mga nakakita.
Nagtuo si Pabroa nga nagkasinabot na sila ni Umpad kay nagsultihanay na sila aron iyang mapasabot.
Nakugang na lang siya dihang giatangan na siya ni Umpad sayo sa buntag.
Kasong homicide ang ipasaka sa kapulisan batok kang Pabroa, kinsa nagtingkagol na sa bilanggoan.(GPL)