MALALAG, Davao del Sur -- Nakahiagom og mga samad sa nagkadaiyang parte sa kalawasan ang usa ka lalaki nga hubog human gibunalan og sanga sa "Madre de Cacao" sa iyang katagay og ilimnong makahubog.
Nasayran nga gihagit niini og sinumbagay ang kauban sa tagay didto sa Purok 3, Barangay Mabini, alas 5 sa hapon, Lunes.
Sa taho sa Malalag Municipal Police Station, nailhan ang biktima nga si Jomer Enan Lindo, 38 anyos, minyo, mag-uuma nga molupyo sa lugar.
Ang suspek nailhan nga mao si Faustino Monton Tecson, 59 anyos, minyo, silingan ra sab sa biktima.
Atol sa imbestigasyon sa kapolisan, nasayran nga pulos lango sa ilimnong makahubog ang duha nga miresulta sa ilang panaglalis.
Napungot ang suspek sa gihimo sa biktima, hinungdan nga iya kining gilatos sa sanga sa maong kahoy ug nahiagom sa mga samad ang kalawasan.
Human sa insidente, paspas nga mikagiw palayo sa lugar ang suspek, hinungdan nga gilusad ang hot pursuit operation hangtud nga nasikop kini.
Sa kasamtangan, napadlak na sa selda sa kapolisan ang suspek ug pasakaan sa tukmang kaso subay sa salaod nga iyang nahimo. (Orlando B. Dinoy)