NORTH COTABATO -- Usa ka 84 anyos nga lalaki ang natala nga pinaka-una nga confirmed Covid-19-positive death sa probinsya sa Cotabato adlaw nga Lunes.
Kini mismo ang gikomperma sa Department of Health (DOH) tracker diin ang pasyente nagpuyo sa Barangay Sudapin, Kidapawan City.
Ang biktima nakabsan sa iyang kinabuhi sulod sa Southern Philippines Medical Center (SPMC) sa Davao City.
Base sa tracker sa DOH-Soccsksargen, namatay ang pasyente gumikan sa underlying medical condition susama sa cardiac arrhythmia secondary to hyperkalemia, acute coronary syndrome, Non ST-Elevation myocardial infarction, acute respiratory failure type 1 secondary to community acquired pneumonia ug coronavirus disease (Covid-19).
Kahinumdoman nga ang travel history sa biktima gikan sa tulo ka balay tambalanan sa Davao City.
Nagpabilin sab nga zero local transmission case ang tibuok probinsya sa Cotabato lakip na sa dakbayan sa Kidapawan.
Una na nga nagnegatibo sa RT-PCR test ang tanan nga mga paryente, pamilya ug hospital personnel sa Kidapawan City nga nakauban sa pasyente.
Giwagtang sab dayon sa City Government sa Kidapawan ang focus containment o "partial lockdown" sa Barangay Sudapin kung diin didto nagpuyo ang 84 anyos.
Nagpasidaan ang City Health Office sa publiko nga sundon ang minimum health protocols sa paglikay aron dili matakdan sa Covid-19. (Edgar Fuerzas)