PAMPANGA

Garcia: E Sasaryang Pamitalubu? (Unintentional Rebirth?)

Kapisik

E WARI alang kabaldugan nung mamasa pa karing aske-pusung tanda? Uli ning magmula na lang maglasang atdu king metung-mung dane dalan ning pamisamak manayang kapalit.

Ing pusung ini asne katbud, e'man masosora mengari king apatsuluk a durugang. Aganaka da ka sinaguli ay, ing kekang yumu kanita balamu mo alang anting pamisamut.

Ing timan mu yapsa na ku inya ing kamatayan paglolwan na ku e na kasalungat ning laru king kislap ning api a daragul anting dapug a tatampud king linang.

Ing legwan mu papatilakan na kung sari inya sa't ing bye tatabili na ku e aliwa king alung kapurit mangalbag maging alawling sasamul king talimunduk. -- Mikk Benares, "Sinamul a Talimunduk," 07.07.20

***

Inya kanung panaun ning Gyerang Apon deng tau keti Kapampangan mamangulkul la bang atin lang pulanditan kabud datang la reng mamomba -- Apon la man o Amerikanu. Kareng kulkul a asna kalalam at kakaba karin na la alu manuknangan neng ala lang patugut deng eroplanung dusuldit mamomba. Inya sa't ngana kanakung tata ku inya kanung panaung ita kukutang na king sarili na, "O't kaya mibait ku pa?"

Tutu pin naman, deng anak kanita e la makapagaral, e la makapamyalung e la makalibut anti karing kayanakan ngeni uli ning disnan dang gyera king panaung akagisingan da. Kasapwak da -- gyera na.

Kanita kasi ala pang internet, computers at cellphone -- Android man o iPhone -- telegrama mu ampong telepanu agya mang den mung masalapi deng makagamit kareta. Buri nang sabyan nita maragul ing pilatan ning denasan da kanita deng kayanakan kesa keng daranasan da reng kayanakan ngening panaun ning kaligaligang panglaganas a malilyari kekatamu ngeni apat nang bulan ing milabas at angga man ngeni ati pa.

Nanu mung malyari mung daptan nung anak ka at makatuknang ka king aun king kekaban ding balang aldo. Nanung pamyalungan mu? Ninung malyari mung akakyalung? Aliwa ding pengari mu. Nung atin kang sese asu o pusa, mekad pa makapakyalung ka karela dapot ing kutang-angga mu nukarin at nanu mu ing malyari yung pyalungan?

Ing sakit e ka man malyaring mamili nung mibait ka o ali uling kabud na ka mu mibait keng kaniting panaun, king kaniting pamilya, kaniting balen at kareting abe mu ngeni at keti. E mo man apili nung ninung magi mung pengari, kapatad at kasiping bale.

Pinili mu ngan ite? King metung a dane, ali -- dapot king dane sumangid, wa pinili mu inyang minunang bye mu bayu ini. Mitalubu ka pauli ding sablang bage pemandapat mu kanita at karing minuna mu pang bye e mu man agyung aganaka pa uli ning dekalan at kelambatan at uli na ning e ya pantas ing utak ning ninu man at kayabe na ka kareta. Aku man syempre.

Agyang ing mangapalyari king kasalungsungan bunga ning sablang mengalabas mung pemandapat inya pin sa'pupupulan mu ngeni ing sablang tenam mu karing mengapayuna at mengalabas mung bye.

Talubu? Sirya mo o ali? Uling ing anggang mengaplayari keka e mu malyaring iparsala karing aliwa uli ning pasya mung gawan ini, gawan ita inya miparas ka king kabilyan mu ngeni. Inya lalakad ka-e uling pamintwan mo reng bitis mu nung e uling deng bitis mu mamintu la mu king kapagnasan mu. Deng sablang dake ning katawan mu-mamintu la mu karing sablang kapagnasan at pamalak mu. Subali mu ring laman a e kaylangan yutus anti ing isip, ding panamdam, inawa, ing pusu, ing dungus at laman niti at pamandurut ning daya mu.

Ing pamitalubu mu-agyang e mu sirya o binalak mu-nung e milyari iti uli ning sampulung ding sablang kapagnasan mu karing mengalabas mung bye. Nung nanung tenam mu ya namang pupulan mu.

***

Dake Talabaldugan:

lipas (panguri) lagpas, lagpus, limpas. English -- lapsed or late as of designated time or schedule. Alimbawa king pamangamit: "Lipas ya keng pisabing aldo ing pamamayad nang Isku inya siklit da la retang inutang na keng kayang panakitan king sunlag."

lipás¹ (panguri) meluma na, ala na king usu, pigsawan da na. English -- out style, passe (s.o, clothes, procedures, practice). Alimbawa king pamangamit: "Lipas na ing pamamiblas a buri nang Anding inya neng maglakad ya keng kabalenan asno karakal deng magsisti kaya agyang e no man sikasu."

lipás² (panguri) pasu, ala nang talab, mesira na, mebangnas na. English -- rendered impotent or ineffective; expired, lapsed usefulness (s.o. drugs, prescriptions, chemical combinations, and ot yet used after the time of potency has lapsed.) Alimbawa king pamangamit: "Lipas na ing inusuk nang panulu ning talapanulu ning karelang pamilya inya digsu na la mengamate deng anak a pepaynuman da kareti."

***

Sadyang gawi da reng Kapampangan

Bayaniyan. Gawi da reng kabalen ita neng lilipat deng lugar ing bale da reng pamilya at deng siping bale at kamaganak ilang saup-saup mamwat u man karin ing pilipatan. Maralas asna karayu ing pilipatan inya deng magbayaniyan pagdala da la pang pamangan a bakal ba'lang e mirasnan danup keg dalan. Deng mamwat magkanta-kanta la naman o atin lang abe manigtigan at magkanta, manggitara at magparatap at pakabug-kabug kabang susulung la pati na neng paynawa lang saguli.

Ngeni, mekalingwan na ing bayaniyan at maupa na lang saken a manakut keng bale lilipat da reng mikipibale-bale.

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan -- ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph