BISAN ubos sa enhanced community quarantine (ECQ) ang dakbayan sa Sugbo, nagpadayon gihapon sa illegal nga negusyo ang mga durugista.
Gani, moabot og P1 million nga balor sa illegal nga drugas ang nasakmit sa Philippine Drug Enforcement Agency 7 (PDEA) 7 atol sa duha ka mga hugna nga anti-drug operations sa managlahing mga lugar sa Dakbayan sa Sugbo.
Ang duh aka mga barangay nga gihimoan sa anti drug operations puro naa sa top 20 ka barangays nga taas og mga kaso sa coronavirus disease (Covid-19).
Pipila ka bahin sa mao nga mga barangay gipaubos sa hard lockdown.
Alas 10:30 sa Martes sa buntag, Hulyo 7, nasikop sa mga operatiba sa PDEA-7, inabagan sa Police Regional Office 7 (PRO), ang usa ka high value target sa sitio Sun-oc, Barangay Lahug, Dakbayan sa Sugbo.
Ang nasikop giila nga si Jereme Sanchez Duran, alyas Joan, 38, fish vendor, taga Barangay Ermita, Siyudad sa Sugbo.
Nasakmit gikan kang Sanchez ang 11 ka mga pakete sa gituohang shabu nga motimbang 50 gramos nga balor og P340,000 base sa Dangerous Drugs Board (DDB) value.
Sa gilusad nga imbestigasyon, gibutyag ni Duran asa siya magkuhaan sa illegal nga drugas hinungdan nga gilusad dayon ang follow-up operation pagka alas 3 sa hapon sa Sitio Kalubihan, Barangay Sambag 1.
Kini niresulta sa pagkasikop sa duha ka drug personalities.
Ang mga nadakpan giila nga sila si Jorda Fiel Miral, 31, alyas Dangas, ug Romualdo Bijasa Jr., pulos taga Barangay Ermita, Dakbayan sa Sugbo.
Nakuha gikan kanila ang duha ka dagkong putos sa gituohang shabu nga motimbang og 100 gramos nga balor og P680,000.
Matod ni Leia Alcantara, information officer sa PDEA-7, nga duha ka semana nila nga gilusad ang surveillance ug case build up human makadawat og impormasyon gikan sa ilang confidential informant kalabot sa kalihukan ni Duran.
Makabaligya ang mga dinakpan og 300 gramos sa gituohang shabu matag semana. (AYB)