DAKO ang kahigayunan nga makalingkawas na sa enhanced community quarantine (ECQ) ang Dakbayan sa Sugbo sa Hulyo 16, 2020.
Apan di tanang mga barangay sa siyudad ang malugakan kay ang 20 ka mga dapit nga dunay labing taas og mga kaso sa coronavirus disease (Covid-19) ug daghan og namatay, magpabilin sa “hard lockdown.”
Mao kini ang pamahayag ni Department of Environment and Natural Resources (DENR) Secretary Roy Cimatu, overseer sa Covid-19 response sa Dakbayan sa Sugbo sa usa ka press conference sa Martes, Hulyo 7, 2020.
Gawas sa “granular lockdown,” hingusgan usab sa Dakbayan sa Sugbo ang contact tracing hinungdan nga nangayog abag si Police Regional Office (PRO) 7 Chief Brigadier General Albert Ignatius Ferro kang Baguio City Mayor Benjamin Magalong.
Ang Baguio City malampuson sa ilang pagkombate batok sa Covid-19 tungod sa paspas nga contact tracing system nga gipatuman ni Magalong.
Ang kapulisan sa iyang siyudad maoy iyang gigamit sa contract tracing tungod sa abilidad niini sa “cognitive interview.”
"The ECQ might be lifted and it will be downgraded to GCQ. However, there will be lockdowns and these lockdowns will still be targeted doon sa mga barangays na mataas ang kanilang cases, new cases, old cases at saka death," pasabot ni Cimatu.
Si Cimatu subling nipatugbaw sa dakong papel sa mga barangay kapitan sa kombate batok sa Covid-19.
Matod niya nga ang mga barangay kapitan dako og papel sa pagpugong sa mga tawo sa ilang dapit nga di manggawas sa ilang mga balay ug kanunay motuman sa mga health protocol sa kagamhanan.
Si Cimatu niingon nga ang barangay officials maoy yawe sa malampusong kombate sa kaaway nga di makita.
"Out of the 80 barangays, 20 ang medyo mataas. The nature of the lockdown will be granular, meaning it does not necessarily mean that yung isang barangay ma-lockdown,” dason sa opisyal.
Matod niya nga mahimong sityo, karsada o balay lang ang ibutang sa hard lockdown, depende sa sitwasyon sa dapit.
Wa gibutyag ni Cimatu kon unsa nga mga barangay ang taas og mga kaso sa Covid-19.
Mga duha ka semana ang nakalabay, si Cimatu nitumbok og 12 ka mga barangay nga taas og mga kaso sa Covid, apan paglabay sa pipila ka mga adlaw, gihimo kini nilang 20.
Mohimo pa sila og assessment sa mao nga mga barangay ning mosunod nga mga adlaw.
TRACING TEAMS
Kay usa sa mga rekisito sa epektibong lakang batok sa Covid-19 mao ang contact tracing, nagtinguha karon ang Siyudad nga madugangan pa ang 35 ka teams nga naumol na.
Alang kang Magalong, ang 35 ka contact tracing teams di paigo.
Busa, ang kapulisan ug kasundaluhan apil na gisugdan og bansay sa Martes, Hulyo 7 ubos sa pagtugot sa PRO 7. (Lahi nga estorya sa pahina 3.)
Nangulo sa training si Magalong.
Gipasabot niya nga wa sila moanhi sa Sugbo aron usbon ang sistema nga gipatuman sa mga lokal nga opisyal sa pagtubag sa Covid responde, kon di ang pagpalambo pa sa kapasidad sa contact tracing.
“We are here to train people to enhance their capacity in contact tracing,” matod ni Magalong.
Dugang pa niya nga iyang ipaambit ang ilang mga best practices sa Baguio ug ubang mga lungsod sa probinsya sa Cordillera pagbatok sa Covid-19.
Matod niya nga ilang bansayon ang health workers, doctors, nurses ug mga investigators gikan sa Philippine National Police ug ubang law enforcers, apil na ang mga sundawo, sama nga adunay cognitive interviewing skills.
Dala sa mayor ang uyang unom ka trainors nga pulos eksperto sa natad sa geographical information system (GIS) ug link analysis.
“The more teams that we have for contact tracing, the better. Yun naman ang basic principle ng contact tracing. Di mo pwede sabihin dito nab aka sumobra tayo sa number,” pasabot ni Magalong.
Siya nipahimangno nga ang contact tracing usa sa mga kapoy nga pamaagi pagbatok sa Covid-19.
Si Cimatu naglaum nga dako kaayo og ikatabang sila si Magalong ug kauban ning paghingusog sa kombate batok sa Covid-19 pinaagi sa contact tracing.
Matod ni Cimatu nga dako og ikatabang ang contact tracing sa pagtultol sa mga dapit nga angay ipailawom sa hard lockdown kon mag-GCQ na ang Dakbayan sa Sugbo.
“Makikita na natin, specific yung ating mga targets,” dugang ni Cimatu. (PAC, AYB)