SUPERBALITA CEBU

Migallen: Wake up call sa Cesafi

Taym pa

NAUTINGKAY og balik kining isyu kalabot niining mga Manila-based schools/universities nga mang-recruit og mga basketball players sa mga eskuwelahan dinhi sa Sugbo.

Kini human nabaniog nga si Leobert Andrew 'LA' Casinillo, ang usa sa mga lig-ong haligi sa multi-titled sa Sacred Heart School-Ateneo de Cebu Magis Eagles, mobalhin na sa University of Santo Tomas (UST) Tiger Cubs didto sa Kaulohan.

Si Casinillo, 6-1, maoy usa karon sa mga nasigpatan nga mihimo og kasikas sa basketball dinhi sa Sugbo.

High school player pa man tuod si Casinillo, apan ang iyang kalidad sulod sa korte maoy usa sa nakakuha og atensiyon sa mga basketball aficionados, dili lang sa Sugbo kon dili apil na usab ang sa Manila.

Sa dihang migawas sa lokal nga pamantalaan ang maong balita, miani kini og mga nagkadaiyang reaksiyon ilabi na sa dihang mipadayag sa iyang reaksiyon si Cebu Schools Athletic Foundation, Inc (Cesafi) commissioner Felix Tiukinhoy Jr.

Gipahungaw ni Tiukinhoy ang iyang kasagmuyo ngadto ni UST coach Aldin Ayo kinsa maoy mi-recruit ni Casinillo.

Actually, niadto pa ning Enero nagpahigayon ang UST og tryout diha sa Cebu Sports Club diin kapin o kulang 200 ka mga batan-on ug aspiring players ang misalmot.

Sa tanan, kon wa ko masayop, si Casinillo ra ang nakakabig sa interest ni Ayo ug sa way langan-langan, uban sa amahan niini nga si Leo Casinillo, ila gilayon kining gitanyagan.

Hinuon niadtong higayona, wala pa gyud mo-commit ang amahan ug anak, apan sa dihang mianunsyo na ang Cesafi niadtong Mayo 1, 2020 nga kanselado ang tanan nilang kalihukan sa 2020 season tungod sa hulga sa coronavirus disease (Covid-19), didto nakahukom sila nga dawaton ang oportunidad nga gitanyag sa UST. Dili sila gusto nga mausik ug palabyon ang panahon.

Manglayas man gani nang uban bisan og naa pay Cesafi tournament, unsa pa kaha og kanselado ang tanang kalihukan sa tibuok season.

Sa pagkatinuod lang kining pagpang-recruit og mga players dili ni bag-o ilabi dinhi sa atoa.

Pero wala gyud tay mahimo niini kay gawas nga way balaod nga magpugong sa usa ka student-athlete (ilabi na og high school) sa pagbalhin ngadto sa laing eskuwelahan, ila sab nang katungod, inabagan sa ilang ginikanan, kon asa sila motiwas og eskuwela, uban sa pangindahay nga makab-ot ang ilang damgo.

Kon exposure ang hisgutan, layo ra kaayo ang Cesafi kon itandi sa UAAP ug sa NCAA. Sakto sa television coverage ang ilang mga duwa.

Gawas niini mahashasan ug mapahanas pa og maayo ang abilidad sa usa ka athlete kay daghan mang lega ang kasalmutan.

Dinhi sa atoa, inig human sa Cesafi wala nay laing lega sa eskuwelahan. Magpaabot na sab ta sa sunod tuig. Wala na usay TV coverage.

Unless og dunay milagrong mahitabo o kausaban sa pagpadagan sa Cesafi nga makapaalegri og balik sa Cebu basketball, ug makahatag og lingaw sa mga fans, posibling dili na mamalhin ang atong mga players.

Atong panghinaot nga kining nahitabo ni Casinillo magsilbing wake up call o kaha dakong hagit sa Cesafi, nga mapausbaw ang lega, kay kon dili magpabilin ra gyud tang ingon ani - training ground sa Manila teams. (jun.migallen22@yahoo.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph