GIPAMULTA sa Philippine Basketball Association (PBA) og P20,000 matag usa sila si Japeth Aguilar sa Brgy. Ginebra Gin Kings ug rookie Adrian Wong sa Rain or Shine Elasto Painters gumikan sa pagsupak niini sa quarantine rules sa gobiyerno ning panahon sa pandemya.
Ang duha nahilakip sa mga magduduwa nga nag-ensayo ug ningduwa og 5-on-5 basketball sa luhong gym sa Greenhills sa San Juan, Manila nga nakasupak sa social distancing nga gipatuman sa general community quarantine (GCQ) nunot ning padayong hulga sa coronavirus disease 2019 (Covid-19).
Gawas sa multa, gimanduan sab ni PBA Commissioner Willie Marcial nga magpa-swab test sila si Aguilar ug Wong.
Ipaubos sab sila sa 14 ka mga adlaw nga quarantine una kini mokuha og confirmatory test sa dili pa sila hatagan og pagtugot sa PBA nga makaduwa.
Gimanduan sab ni Marcial ang duha ka mga magduduwa nga mag-community service nga molanat og 30 ka mga oras.
Gitugtan na man tuod sa gobiyerno ang PBA nga makapahigayon og training alang sa ilang teams apan kinahanglang motuman kini sa health protocols ug gidili pa ang 5-on-5 nga duwa.
Matod ni Marcial nga nangayo na kaniya og pasaylo sila si Aguilar ug Wong.
Kauban sab nga ningduwa nila ni Aguilar ug Wong mao sila si Japan-bound Thirdy Ravena ug Columbian Dyip draft pick Isaac Go.
Hinuon alang sa PBA, wala sila'y katungod nga mosilot nila ni Ravena ug Go gumikan kay wala man kini sa ilang puder.
Bisan gikuha si Go sa Columbian Dyip, usa sa teams sa PBA, apan kasamtangan pa kining gipahuwam sa liga ngadto sa Sama hang Basketbol ng Pilipinas (SBP) isip sakop sa Gilas Pilipinas national pool nga mokombati sa 2023 Fiba Basketball World Cup. (ESL)