Balay-Balay, Tubig-Tubig: ATL sukwahi sa Constitution

PROTESTA: Ang mga tinun-an nga nagtapok ug nagprotesta batok sa pagpasar sa anti-terrorism bill niadto sa gawas sa Universtiy of the Philippines (UP) Cebu sa Barangay Lahug, dakbayan sa Sugbo apan gipuhag sa awtoridad. (SunStar file photo)
PROTESTA: Ang mga tinun-an nga nagtapok ug nagprotesta batok sa pagpasar sa anti-terrorism bill niadto sa gawas sa Universtiy of the Philippines (UP) Cebu sa Barangay Lahug, dakbayan sa Sugbo apan gipuhag sa awtoridad. (SunStar file photo)

HUGOT nga gibatukan sa CLB ang Anti-Terrorism Law (ATL). Nasukwahi kini sa Batakang Balaod. Makababag sa katungod sa kabataan nga mangilabot sa katilingban.

Lakip sa mga katungod sa mga bata mao ang gilatid sa 1987 Philippine Constitution. Ang maong mga katungod angay nga panalipdan ug dili mahimong wagtangon.

Giaprubahan ang ATL sa tinguha nga malikayan ang terorismo sa nasod. Apan kon susihon nimo ang maong balaud, dili kini maoy tubag sa pagpahunong sa terorismo.

Gani, dugang problema ang atubangon sa katilingban tungod kay walay klaro ug halapad ang pagpasabot bahin sa terorismo.

Isip non-government organization (NGO) nga progresibo ug kritiko sa mga polisiya ug programa sa kagamhanan nga dili haom sa kalamboan sa mga bata, nabalaka ang CLB sa paghulagway kon unsa ang terorismo ubos sa ATL.

Kon mapatuman ang maong balaud, mahimong krimen ang mga legal nga kalihukan nga ipahigayon batok sa gobiyerno sama sa mga lihok protesta, strike sa mga mamumuo, mga training ug seminar nga nagtinguha nga malamdagan ang katawhan sa mga nagkadaiyang isyu sa ilang komunidad.

Dili terorista ang CLB ug ang mga mamumuo nga naglangkob niini. Apan kon mapatuman ang ATLl, dili halayo nga lainon og pagsabot sa mga nagpatuman sa maong balaod ang pakiglambigit sa organisasyon sa mga hisgutanan sa human rights and development.

Kini labaw na nga dali lang kaayo ang pag-target sa mga hugpong nga mokuwestyon sa gobiyerno ug pagtumo-tumo sa pasangil nga komunista o terorista sila.

Pipila sa mga katawhong katungod nga maapektuhan sa ATL mao ang right to life, liberty, and property, right to privacy, ug ang freedom of assembly and association.

Subay sa Philippine Constitution, dili mahimong mabalhog o matanggongang usa ka tawo og kapin tulo (3) ka adlaw kon walay kaso nga masang-at batok kaniya bisan pa man sa pagsuspenso sa privilege of the writ of habeas corpus.

Apan tataw sa ATL ang pagtugot nga gihatag ngadto sa Anti-Terrorism Council (ATC) nga dakpon ang mga gisuspetsahan nga mga terorista bisan pa man nga walay kaso ug walay arrest warrant sulod sa katorse (14) ngadto sa baynte kwatro (24) ka adlaw.

Tungod sa maong polisiya sa balaud, gihikawan ang korte sa iyang mandato nga mohukom kon angay dakpon ang usa ka tawo.

Tungod nga milapas ang adlaw sa detention o pagka-aresto sa gidudahang terorista kon itandi sa Constitution, dili makaangayon ang maong polisiya.

Adbokasiya sa CLB ang participation rights sa matag bata. Gikahadlukan ang negatibong epekto sa balaud sa pagserbisyo ngadto sa mga bata ug kabataan, sama sa pagpundok kanila aron masayod sila sa ilang mga katungod isip pamaagi sa pag-andam kanila nga mahimong aktibo ug responsable nga lumolupyo sa atong komunidad.

Ubos sa Article 12 ug 13 sa Convention on the Rights of the Child, gimandoan ang matag estado nga “ipasiguro nga matugutan ang matag bata nga mpadayag sa iyang mga panan-aw ug madunggan ang habig ini sa judicial ug administrative proceedings.

Mahimo sab nga magpamiyembro ang mga bata sa mga grupo nga dunay susamang panlantaw kanila.

Kon mapatuman ang ATL, kinahanglan pang i-eksamin ang matag bata kon mu-uyon ba ang panglantaw niini sa mata sa gobiyerno. Dili kini mao ang esensya sa katungod nga gigahin alang sa mga bata ug kabataan.

Dili malikayan nga dunay mga higayon nga dili muyon ang bata o kabataan sa mga polisiya sa gobyerno.

Kon mahimo na nga balaud ang ATL, makahatag kini og kabalaka ug mapugngan ang paggamit sa mga katawhong katungod tungod sa kahadlok nga madudahan nga terorista.

Sukwahi sa kalambuan sa matag bata ug kabataan ang ATL ingon man sa tibuok katawhan.

Angay lang nga ibasura ang ATL. Inay nga ipatuman ang maong balaud, angay nga buhaton sa gobiyerno mao ang paghatag og solusyon sa mga problema nga giatubang sa katawhan nunot sa pandemiya.

Sama sa pagminos sa kaso sa Covid-19, pagpang-apud-apod og ayuda, ug pagpanalipod sa kababayen-an, kabataan ug mga bata nga posibleng mabiktima sa pagpangabuso ug pagpanghimulos sulod sa ilang mga panimalay.

Inay nga hadlukon ang mga kritiko, labing maayong sulbaron usa sa gobyerno ang mga suliran sa pandemiya.

[Mahimong mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o ipadala sa among Facebook page nga “Children’s Legal Bureau” m.me/ChildrensLegalBureauInc (Messenger)]

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph