SUPERBALITA CEBU

Diputado: Mga isyu sa kaparian

Cuentas Claras

NAHINABI nako ang usa ka pari sa miaging adlaw. Daghan kami og nahisgotan. Usa na niini mao ang korapsiyon.

Nakurat ako sa iyang gisulti tungod kay naa diay isyu sa korapsiyon sa han-ay sa mga pari?

Niinsister siya nga aduna apan, ang kasagaran nga mahitabo, tapin-an lang kini sa kadagkoan sa simbahan. Dili na ipagawas sa uban.

Nakasabot ako kon ngano nga gibuhat kini sa kadagkoan sa simbahan. Duna silay laing klase nga hustisya.

Buyno, dunay klaseklase nga "silot" nga ipahamtang sa napamatud-an nga sad-an, apan dili kini dayag nga ipahibalo sa katawhan. Usa na niini mao ang suspensiyon.

Dili tugotan nga magpabilin ang pari sa iyang parokya ug mo-leave siya sa iyang mga gimbuhaton sulod sa gidugayon sa iyang suspensiyon.

Kon dili niya kini tumanon o molapas siya sa lagda sa suspensiyon, mao pa kining panahona nga ipahibalo sa katawhan ang iyang suspensiyon.

Ang kabug-at sa silot mag-agad sa kabug-at sa sala nga nahimo sa pari.

* * *

Sa ilang kamandoan karon, aduna nay gitawag og binulan nga allowance nga susama sa suweldo.

Libre ang ilang pagkaon og pagpuyo kay apil man kini sa kagastohan sa parokya.

Aron patas ug malikayan ang bikilbikil sa assignment sa mga parokya, parehas ra ang allowance sa kaparian bisan kon gamay o dako ang iyang parokya.

Bisan pa niini, aduna gihapoy gitawag og "amigo" ug "dili kaayo amigo". Kini ang basehan sa assignment sa parokya.

Ang uban kanila, girehistro sa Social Security System (SSS) sama sa mga pribado nga mga empleyado. Dinhi masulod ang korapsiyon.

Matod sa pari, natingala siya nga adunay mga bulan nga wala sila makabayad sa binulan nga balayranan sa SSS nga unta, kanunay ang deduction sa ilang allowance.

* * *

Sa dihang nahisgotan na namo ang bahin sa retirement, misulti ang pari nga aduna man silay gitawag og retirement benefits pero ang ilang problema kanang moabot ang panahon nga masakit sila, labi na sa mga edaran na.

Kasagaran kanila, magsalig na lang sa mohinabang kanila. Kon asa sila mo-retire, kasagaran anha ra sab sila mopahaway og maghulat kanus-a sila tawgon sa final call.

Walay klaro ang ilang kahimtang human sa ilang retirement. Mag-agad kini sa kamaayo o kadaotan sa Obispo.

Mao kini ang bug-at nila nga problema. Sa mga katuigan nga himsog pa ang ilang panglawas, gihurot nila ang ilang panahon ug katakos sa pagserbisyo sa Diyos ug sa mga katawhan.

Apan subo nga palandongon nga kon mo-retiro na sila, tigulang na o kaha, masakiton na, kasagaran makalimtan na lang sila ug wala nay makahinumdom pa kanila.

Wala nay mopamisa kanila o mopakompisal o mangimbitar sa mga salo-salo o bisan unsang kalihokan. Makadawat sila og 'grasya' kon dunay mahinumdom pag-imbetar kanila.

Mao kini hinungdan nga moboluntaryo na lang ang uban og saulog sa misa aron lang makadawat og hinabang gikan sa ilang adtoan.

Pasagdan na lang sila hangtod mawala na gyod sila sa dayon, tungod sa sakit o kaha tungod sa pangedaron.

Angayan lang nga tagdon kining maong isyu sa kadagkoan sa simbahan og himoon kining basehan sa tanang mga parokya og ang Obispo mismo ang mopasunod niini.

Angay hunahunaon nga kasagaran kanila, wala nay matawag nga pamilya, walay asawa o mga anak (gawas adtong nagpabadlong) nga maoy mosuporta kanila sa ilang mga panginahanglan.

Angayan lang nga suklian ang katim-os nila nga pag-alagad ug pagserbisyo sa Diyos ug sa katawhan pinaagi sa pagpahimutang kanila sa usa ka disente, komportable og malinawon nga lugar-pahulayan.

Mahimo kaha kini?


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph