AKONG gisubay sa dihang mibuto ang isyu nga dunay peke nga QR-coded passes nga gigamit sa pipila ka mga tawo sa ilang paglakaw.
Apan dili na kini sayop sa Cebu City Government sa pagpanguna ni Cebu City Mayor Edgardo Labella ug mga kauban.
Sala na kini sa mga tawo nga nagpalusot pinaagi sa pagpakopya aron ilang magamit sa pagawas sa ilang balay.
Ang siyudad nihimo og QR-code passes nga mokabat sa 178,000 aron iapud-apod sa matag kabalayan. Gituyo ang pagminos sa gidaghanon aron makontrolar ang pagawas sa ilang panimalay. Sama sa nahitabo sa unang ECQ pass sa siyudad daghang manggawas kay daghan ang gitagaan.
Karon akong naobserbahan nga minos ang gidaghanon sa pagpanggawas sa mga tawo kay estrikto sab kaayo ang kapulisan ug militar nga nagbantay sa kadalanan.
NANGITAG SAYOP?
Maayo unta og motabang ang kampo ni kanhi Cebu City mayor Tomas Osmeña sa krisis sa Covid-19 karon sa siyudad sa Sugbo.
Sama sa gihimo sa daghang mga indibiduwal o tawo nga mihatag og ayuda sa mga apektado sa krisis.
Daghan ang nakabantay nga ang gihimo ni Osmeña nga nagsige na lang sa pagpangita og sayop sa pagdumala ni Labella.
Way problema ang pagbantay kon giunsa pagamit ang kuwarta. Ipakita sab unta karong panahona nga kamo adunay natabang.
Maayo pa si Mayor Magalong sa Baguio City nga niabot sa siyudad ang iyang team aron mo-assist o moatabang sa dakbayan.
Mao sab ang gihimo ni Bise Presidente Leni Robredo nga niana sa Sugbo ang iyang team aron pagtabang sa frontliners.
SUD SA OSPITAL
Sa mga ospital, taliwa sa Covid-19 crisis, di gyud malikayan nga duol ang kahigayunan nga matakdan kay anaa ang mga pasyente sa Covid-19 nga na-admit.
Mao nga daghang pasyente nga negatibo sa pagsud sa ospital, apan unsang pagkabutangam, inig gawas mahimo manang positibo sa virus.
Samotan pa nga airborne, matud pa sa mga pagtuon sa mga researcher sa University of the Philippine.
efrenlonzon71@gmail.com o text sa 09235562777